ରାତିକ ଭିତରେ ବଦଳି ଯାଉଛି
ସ୍ମୃତି ଚିହ୍ନ ସଂପର୍କର,
ରାତି ପାହିଲେ ଲେଖା ହୋଇଯାଏ
ନାମ ଏକ ନୂଆ ବରଷର ।
ଗୋଟେ କ୍ୟାଲେଣ୍ଡର ହୁଏ ଅଲୋଡ଼ା
ଡିସେମ୍ବର ଶେଷ ରାତିରେ,
ଯୋଡ଼ି ହୋଇଯାଏ ଭିନ୍ନ ଏକ ବର୍ଷ
ଜାନୁଆରୀ ପ୍ରଥମ ପୃଷ୍ଠାରେ ।
ଡିସେମ୍ୱରକୁ ଜାନୁଆରୀ ସିନା
ମିଳିଯାଏ ହାତ ପାହାନ୍ତାରେ,
ହେଲେ ତତେ ମୁଁ ପାଇବା ପାଇଁ
ଗୋଟିଏ ବରଷ ଅପେକ୍ଷା କରେ ।
ତୁ ଡିସେମ୍ବରର ଶେଷରାତି
ମୁଁ ପହିଲି ସକାଳ ଜାନୁଆରୀର,
ଏତେ ପାଖାପାଖୂ ଆମେ ଦୁହେଁ
ଦୂରତା ଗୋଟିଏ ବର୍ଷର ।
ଦୂରତା ଭିତରେ ନିବିଡ଼ ସଂପର୍କ
ମିଳନ ତ କିଛି କ୍ଷଣର,
ମିଳନ ବିଦାୟ ଲାଗି ରହିଥାଏ
ନିୟମ ପରା ଏ ସଂସାରର ।
– ସ୍ୱାଗତ ମିଶ୍ର
Comments
ସ୍ଵାଗତ ମିଶ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
