ସତ୍ୟ କର୍ମ ବୃକ୍ଷ ଶାଖା ପ୍ରଶାଖାରେ
ଦେଖି ହୃଷ୍ଟପ୍ରୁଷ୍ଟ ଫୁଲ
ବାତ୍ୟା ସାଥେ ଘନ ରୋଷେ ବରଷିଲେ
ଉଜାଡ଼ି ଜୀବନ ମୂଳ ।
ହେଲା ମହୀ ପତିତ,
ସାତ ବାସରରେ ଅକସ୍ମାତ ।
ମହୀରୁହ ହୃଦ କେସନେ କରିବ
ସପନର ସୌଦାଗର,
ଲୋଭ ମାୟା ମୋହ ବରଜି
ନୁହଇ ବୋହି ନର କଳେବର ।
ପ୍ରିତି ଶରୀର ଝର,
ଶରୀରରୁ ବହେ ନିରନ୍ତର ।
ବାସାନ୍ତର କରି ବାସରୁ ଓଟାରି
ବାହାରେ କରିଲ ଠିଆ,
ବୈନତେୟ ପୃଷ୍ଠେ ବସି ବିହରୁଛ
ଭଙ୍ଗା ଗଢ଼ାର ଦୁନିଆ ।
ହରି ମାଗୁଛି ଭିକ,
ଦାନଦେଇ ହର ଆମ୍ଭ ଶୋକ ।
ଅନ୍ତର୍ଗତ ବ୍ୟଥା କହିବି କାହାକୁ
ତୁମ୍ଭ ପରି ଥାଇ ଦାତା,
ପଶୁଛି ଶରଣ କାଳିୟ ଦଳନ
ବିଶ୍ୱ ବ୍ରହ୍ମାଣ୍ଡ ବିଧାତା ।
ପ୍ରେମ କରୁଣା ତୋୟ,
ସିଞ୍ଚନେ କର ଜୀବନମୟ ।
ଅଗଣାରେ ମୋର ଫୁଟିଉଠୁ
ପୁଣି ସେନେହ ଶରଧା ଫୁଲ,
ନିର୍ବାପିତ ହେଉ ଅନ୍ତର
ଗହନ ଶୋକକ୍ଳେଶର ଗରଳ,
ହେଉ କିଞ୍ଚିତେ ଦୟା,
ଫେରାଇ ଦିଅ ଗ୍ରୀଷ୍ମର ଛାୟା ।
– ଅଲେଖ ମେହେର
Comments
ଅଲେଖ ମେହେର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
