ସୁଦର୍ଶନ ହେଲା ଯେ ତୁମର ଆକର୍ଷଣୀୟ ଆନନ,
ଅନ୍ତଃକରଣରେ ସୃଷ୍ଟି ହେଲା କୋମଳ କମ୍ପନ,
ତକ୍ଷଣ ଶୁଭେଇଲା ପ୍ରେମଗୀତର ଗନ୍ଧର୍ବ ଗୁଞ୍ଜନ,
ଲାଗେ ଯେ ମଳୟାନିଳର ହୋଇଛି ପ୍ରଭଞ୍ଜନ |୧|
ସଙ୍ଗମ ହେଲା ତୁମ କଜ୍ୱଳିତ ନୟନ ସହ ମୋ ନୟନ,
ମନ୍ତ୍ରମୁଗ୍ଧ ହୋଇ ରୁଣୁଝୁଣୁ ନାଚିଲା ମୋ ଅଧୀର ମନ,
ନିର୍ଜନ ନବଲୋକକୁ ଶୀଘ୍ର କରିବା ବିହଙ୍ଗ ପରି ବହନ,
ପ୍ରେମାନୁରକ୍ତ ପ୍ରେମଲୋକରେ ସଜେଇବା ସୁନ୍ଦର ସଦନ |୨|
ତୁମ ଅଞ୍ଜନ ଅଳଙ୍କୃତ ନେତ୍ର ଲାଗନ୍ତି ଯେ ମନୋହାରୀ ମୀନ,
ଏହି ସୁରମ୍ୟ ସୌନ୍ଦର୍ଯ୍ୟର କରୁଛି ମୁଁ ଅବିରାମ ଆସ୍ଵାଦନ,
କେବେ କରିବ ମୋ ନିର୍ଜୀବ ନୀରସ ଜୀବନରେ ଆଗମନ,
ତୁମ ବିନା ନିରର୍ଥକ ନିଷ୍ପ୍ରୟୋଜନ ଲାଗୁଛି ଏହି ଭୂମି ଭୁବନ |୩|
ସମ୍ମୋହିତ ହେଲି ଦେଖି ତୁମ ସୁମନୋଜ୍ଞ ସୁନୟନ,
କୌଣସି କାର୍ଯ୍ୟର କରି ପାରୁନି ସଂକଳନ ସଂଶୋଧନ,
ମନେ ପଡ଼େ ଯେ ମଳୟଜଶୀତଳ ମଳୟଚନ୍ଦନ,
ସହନଶୀଳ ହୋଇ କଦାପି କରିବନି କ୍ରୋଧ କ୍ରନ୍ଦନ |୪|
ଲାସ୍ୟ ଲୟ କରନ୍ତି ତୁମର ଲାବଣ୍ୟ ଲୋଚନ,
ଋଷିଲେ ବି ମନମୋହକ ତୁମର ସୁଲକ୍ଷଣ ସୁଲୋଚନ,
ଲୁଚି ଲୁଚି ବାଙ୍କଚାହାଣି ପାଇଁ ସୁପ୍ରସିଦ୍ଧ ତୁମ ରାଜୀବଲୋଚନ,
ଏହି ବିଶିଷ୍ଟ ବିମୋହନରୁ ମିଳି ପାରିବନି ବିମୁକ୍ତି ବିମୋଚନ |୫|
ପ୍ରିୟଦର୍ଶନ ମୋ ପାଇଁ ତୁମର ସୌହାର୍ଦ୍ଦ ସପନ,
ଆଖି ଆଗେ ଦିଶେ ତୁମର ବିଲକ୍ଷଣ ବଦନ,
ତୁମର ମୁଖ୍ୟ ଅଳଙ୍କାର ଯେ କୌସ୍ତୁଭ କମଳନୟନ,
ଯାହାର ଚମକଦମକ ମନେ ପକାଏ କାନ୍ତିକର କୁନ୍ଦନ |୬|
ତୁମ ବିରହର କରିପାରୁ ନାହିଁ ସହନ,
ଏହି ଅନଳରେ ହୋଇ ଯାଉଛି ଦହନ,
ତୁମ ଉପସ୍ଥିତି ନୟନତାରା ସମ ଅନୁପମ ଉପନ,
କରୁଛି ଏହି ଅକାଟ୍ୟ ବଚନର ଜ୍ଞାପନ |୭|
ବୁଝିଲ ତୁମେ ମୋର ପ୍ରିତୀକର ଲାଳିତ୍ୟ ଆଳାପନ,
ମନୋହର ମଦନକାଳର କରିଲ ଉପଯୁକ୍ତ ଉଦ୍ଦୀପନ,
ସୁନୟନା ସୁଲୋଚନା ହୋଇ କରିଲ ସରସ ସମାଧାନ,
ଚକାନୟନଙ୍କ ଆଶୀଷରେ ଶେଷ ହେଲା ଏହି ଅନନ୍ୟ ଅନୁସନ୍ଧାନ |୮|
– ରାଜ ଶେଖର ଶ୍ରୀ ଚିମା
Comments
ରାଜ ଶେଖର ଶ୍ରୀ ଚିମା ଓଡ଼ିଆ ତଥା ତେଲୁଗୁ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
