ପରୋକ୍ଷ ପରୋକ୍ଷ କରି ସତେକିରେ
ହୋଇଗଲୁ ଏତେ ପର,
ଜାଣିପାରୁ ନାହୁଁ ଏହି ଶାସନରେ
କିଏ ଅଟଇ ନିଜର ।
ସ୍ଵାଧୀନତା ପରେ ଦେଶ ସୁମରିଲା
ନୂଆ ଶାସନର ମନ୍ତ୍ର,
ଅଛପା ନୁହଇ ସାରା ଜଗତରୁ
ଅଟଇ ସେ ‘ଗଣତନ୍ତ୍ର’ ।
ସେହି ଶାସନର ପରୋକ୍ଷ ପନ୍ଥାକୁ
ଗ୍ରହଣ କଲାଯେ ଦେଶ,
ପ୍ରତିନିଧି ରୂପେ ଆମେ ଦେଖୁଅଛୁ
କେତେଯେ ବିଚିତ୍ର ବେଶ ।
କିଏ କହେ ଦାଦା, କିଏ କହେ ଭାଇ
କିଏ କହେ ଆପା ନାନୀ,
ନିର୍ବାଚନ ପରେ ସାକ୍ଷାତ ହୋଇଲେ
କହନ୍ତି ପାରୁନି ଜାଣି ।
ଗଣ ଶାସନର ପ୍ରକୃତ ଅରଥ
ବଦଳି ଯାଇଛି ଆଜି,
ନିର୍ବାଚନ ପରେ ପ୍ରତ୍ୟେକ କଥାରେ
ହେବାକୁ ପଡ଼େ ଯେ ରାଜି ।
ପ୍ରତ୍ୟକ୍ଷ ଶାସନ ପ୍ରତ୍ୟାହାର ପନ୍ଥା
ଆବଶ୍ୟକ ହୁଏ ଆଜି,
ତେବେ ଯେ ଜାଣିବ ଗଣ ଶାସନର
ପ୍ରକୃତ ଅରଥ ଗାଦି ।
ଗଣ ଅଧିକାର ପ୍ରକୃତ ଅର୍ଥକୁ
ବୁଝିବ ଯେବେ ଏ ଜାତି,
ସୁଶାସନର ଆଭାରେ ଜଳିବ
ଗଣ ଶାସନର ବତି ।
ସେହି ଆଲୁଅରେ ପ୍ରଜ୍ୱଳିତ ହେବ
ଅଦ୍ଭୁତ ତ ସେହି ମନ୍ତ୍ର,
ଉତ୍କୃଷ୍ଟ ଶାସନ ପରିଚିତି ପୁଣି
ଫେରି ପାଇବ ଯେ ଗଣତନ୍ତ୍ର ।
– ପ୍ରଭାତ ମିଶ୍ର
Comments
ପ୍ରଭାତ ମିଶ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
