ତୁଳସୀରେ ମନ ଅବଢ଼ାରେ ମନ
ମନ ରତ୍ନ ସିଂହାସନେ
ବାଇଶୀ ପାହାଚ ବଡଦାଣ୍ଡେ ଭରା
ଧୂଳି ମୁଠେ ଧନ ଧନେ ॥୦॥
ସତରେ କାଳିଆ କେତେ ଦିନ ହେଲା
ଦେଖି ନାହିଁ ତୋ’ର ମୁହଁ
ଥୟ ଧରି ଥିବି ଆଉ କେତେ ଦିନ
ମନ ଖୋଲି ତୁହି କହ
ପରାଣ ଧନରେ ବଞ୍ଚିବି କେମିତି
ଆଶଙ୍କା ଭରୁଛି ମନ ॥୧॥
ଦେଖୁଛି ତୋ’ ବାନା ଫର ଫର ଉଡ଼େ
ହସୁଛି ସେ ନୀଳ ଚକ୍ର
ସତେ କାହିଁ ତେବେ ତୋ’ର ଆର୍ଶୀବାଦ
ମୋହରି ବେଳକୁ ବକ୍ର
ତିଳେ ଦୟା କରି ଭିଡ଼ି ନେ ମୋତେ ତୋ’
ରତ୍ନ ବେଦୀ ଦରଶନେ ॥୨॥
– ଆଶୁତୋଷ ମେହେର
Comments
ଆଶୁତୋଷ ମେହେର ଜଣେ ଅବସର ପ୍ରାପ୍ତ ଭାରତୀୟ ଷ୍ଟେଟ ବ୍ୟାଙ୍କର ଅଧିକାରୀ । ସେ ଓଡ଼ିଆ ଭାଷା ସମେତେ ସମ୍ବଲପୁରୀ ଭାଷାରେ ବିଭିନ୍ନ ପ୍ରକାରର କବିତା ରଚନା କରିନ୍ତି । ତାଙ୍କର ନିଜସ୍ୱ କେତୋଟି କବିତା ସଂକଳନ ପ୍ରକାଶିତ ହୋଇଛି ।
