ପ୍ରେମ ବଦଳରେ ପ୍ରେମ ଚାହିଁଥିଲି କାହିଁ ଦେଲୁ ପ୍ରତାରଣା,
ଟିକେ ଭଲପାଇବା ମାଗି ଥିଲି ବୋଲି ମୋତେ ଦେଲୁ ତୁ ଛଳନା ।
କିଛିଦିନ ପାଇଁ ହସ ଦେଇ ଓଠେ କରି ଚାଲିଗଲ ଏକା,
ଏକା ହେବା ଯଦି ପ୍ରେମର ଭାଗ୍ୟ କାହିଁ ଦେଉଥିଲ ଦେଖା !
ସ୍ନେହ ବଦଳରେ ସ୍ନେହ ମାଗିଥିଲି କାହିଁ କଲୁ ମୋତେ ଘୃଣା,
ଆପଣାର କରି ଖେଳି ଚାଲିଗଲୁ ମୁଁ ନୁହେଁ ଗୋଟେ ଖେଳନା ।
କହିବି କେମିତି ଆମରି ଭିତରେ କେବେ କେହି ଯେ ନଥିଲା,
ବୁଝି ପାରୁନାହିଁ ମୋ ବିରୁଦ୍ଧରେ ତୋ ମନ ଭିତରେ, ସନ୍ଦେହ କିଏ ଭରିଲା ।
ପ୍ରେମ ବଦଳରେ ପ୍ରେମ ଚାହିଁଥିଲି କାହିଁ ଦେଲୁ ପ୍ରତାରଣା !?
ଫୁଲ ବଦଳରେ ଫୁଲ ଚାହିଁଥିଲି କଣ୍ଟା ଦେଲୁ ଉପହାର,
ବିଶ୍ୱାସ ବଦଳରେ ବିଶ୍ୱାସ ନଦେଇ ବିଶ୍ୱାସ ଭାଙ୍ଗିଲୁ ମୋର ।
ମୋ ସାଥେ ଏକାଠି ବାଟ ଚାଲୁ ଚାଲୁ କାହିଁକି ଯେ ରହିଗଲୁ,
ସାଥେ ଚାଲିବାର ପ୍ରତିଶ୍ରୁତି ଦେଇ ଏକା କରି ଚାଲିଗଲୁ ।
ପ୍ରେମ ବଦଳରେ ପ୍ରେମ ଚାହିଁଥିଲି କାହିଁ ଦେଲୁ ପ୍ରତାରଣା !?
ସପନ ଦେଖାଇ ନିଦ ଚୋରିକଲୁ କେଉଁ ଦୋଷ ଥିଲା ମୋର,
ହସିବା ଶିଖାଇ ଲୁହ ଦେଇଗଲୁ କେଉଁ ପ୍ରତିଶୋଧ ନେଲୁ ।
ତୋ’ ହସ ପାଇଁ ତୋ’ ଖୁସି ପାଇଁ ଆସିବିନି କେବେ ଫେରି,
ତୋ’ ମନର କଥା ବୁଝିବା ପାଇଁକି ହୋଇଗଲା ଟିକେ ଡେରି ।
ପ୍ରେମ ବଦଳରେ ପ୍ରେମ ଚାହିଁଥିଲି କାହିଁ ଦେଲୁ ପ୍ରତାରଣା,
ଟିକେ ଭଲପାଇବା ମାଗି ଥିଲି ବୋଲି ମୋତେ ଦେଲୁ ତୁ ଛଳନା ।
– ପଙ୍କଜ କୁମାର ମଙ୍ଗଳ
Comments
ପଙ୍କଜ କୁମାର ମଙ୍ଗଳ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
