ସ୍ୱାଧୀନତା ଅର୍ଥ ମତେ ପଚାରନା
ଆଜି ବି ମୁଁ ପରାଧୀନ
କାହିଁକି ମିଛରେ ଡିଣ୍ଡିମ ପିଟିବି
ନାରୀ ଅଟଇ ସ୍ୱାଧୀନ ॥
ମାତୃଗର୍ଭେ ଯଦି ସଞ୍ଚରିଯାଏ ମୁଁ
ହୁଏ କନ୍ୟାଭୃଣ ହତ୍ୟା
ପୁଅଝିଅ ଭେଦଭାବ ଶବ୍ଦଟିକୁ
ପରଖେ ମୋ’ ଶୈଶବତା ॥
କିଶୋରୀ ଯୁବତୀ କେଉଁ ରୂପ ମୋର
ଚାଖିନାହିଁ ସ୍ୱାଧୀନତା
ସ୍ୱାଧୀନତା କଥା କହିବାଠୁ ଭଲ
ରଖିବି ମୁଁ ନୀରବତା ॥
ବାରମ୍ବାର ପଡ଼େ ଲୋଲୁପ ଚାହାଣୀ
ନାରୀମାଂସ ଲୋଭୀଙ୍କର
ଲୁଣ୍ଠିତା ଲାଞ୍ଛିତା ଧର୍ଷିତା ପତିତା
ହୁଏ ପରିଚୟ ମୋର ॥
ନିଜ ପରିଚୟ ଲୁଚିଯାଇଛି ମୋ
ପୁରୁଷର ପାଦ ତଳେ
ସ୍ୱାଧୀନ ହେବାକୁ ଚେଷ୍ଟା କଲେ ମତେ
ନିନ୍ଦା ଅପବାଦ ମିଳେ ॥
ବିବାହ ବେଦୀରୁ ଯୌତୁକ ରାକ୍ଷସ
ଗଳା ମୋର ଚିପି ଧରେ
କେବେ କିରୋସିନ୍ ନିଆଁରେ ମୁଁ ଜଳେ
କେବେ ଶାବଳ ଚାପାରେ ॥
ସଞ୍ଚରିବା ଠାରୁ ମୃତ୍ୟୁ ପରିଯନ୍ତେ
ମୋ ହାତପାଦରେ ବେଡ଼ି
ସ୍ୱାଧୀନ ବୋଲି ମୁଁ କାହିଁକି କହିବି
ପୁରୁଷ ସାଥିରେ ପଡ଼ି ॥
– ସୌଭାଗ୍ୟବତୀ ଗିରି
Comments
ସୌଭାଗ୍ୟବତୀ ଗିରି ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
