ଆସ ଖେଳିବା ଗୀତ ଗାଇବା
ଏଇ ମାଟିକୁ ଭଲ ପାଇବା
ଆମେ ସବୁ ଭାଇ ଭାଇରେ
ସାନ ବଡ଼ କେହି ନୁହେଁରେ
ଗୋଟିଏ ମାଆର ଆମେ କୋଟିଏ ସନ୍ତାନ
ହୃଦୟରେ ଆମ ଗୋଟିଏ ପ୍ରାଣ
ନିଜେ ହସିବା ଦୁନିଆକୁ ହସାଇବା
ଏଇ ମାଟିକୁ ଆମେ ଭଲ ପାଇବା ॥
ମାଟିମା’ କୋଳେ ଆମେ ନେଇଛୁ ଜନମ
ତା’ରି ପାଣି ପବନରେ ଗଢ଼ା ଆମରି ଜୀବନ
ଏଇ ମାଟି ଆମ ମାଆ
ବିପଦ ଆପଦରେ ହୁଅଇ ସାହା
ତା’ର ଜୟ ଜୟକାର ଆମେ କରିବା
ମାଟି ମାଆକୁ ଆମେ ପୂଜା କରିବା
ଆସ ଖେଳିବା ଗୀତ ଗାଇବା
ମାଟି ମାଆକୁ ଭଲ ପାଇବା ॥
କେତେ ବୀରପୁରୁଷଙ୍କର ଏଇଠି ଜନମ
ସେମାନେ ଥିଲେ ମାଟିମା’ର ସୁଯୋଗ୍ୟ ସନ୍ତାନ
ରଖିବା ପାଇଁ ଦେଶର ମାନ
ଦେଇଥିଲେ ସେ ନିଜର ପ୍ରାଣ
ସେମାନଙ୍କ ପରି ଆମେ ହୋଇବା
ମାଟି ମାଆ ପାଇଁ ଆମେ ଲଢ଼ିବା
ଟିକି ଟିକି କଢ଼ି ଆମେ ଫୁଟିବା କାଲି
ଗୁଣର ମହକ ଦେବା ଦୁନିଆ ଭରି
ମାଟି ମା’କୁ ଆମେ ରକ୍ଷା କରିବାବେଳେ
ବରଂ ଝଡ଼ିଯିବା ଆମେ ଅବେଳରେ
ଦେଶପାଇଁ ଆମେ ପ୍ରାଣ ଦେବା
ନିଜ ଜୀବନକୁ ଧନ୍ୟ କରିବା
ଆସ ଖେଳିବା ଗୀତ ଗାଇବା
ମାଟି ମାଆକୁ ଆମେ ଭଲ ପାଇବା ॥
– ସୁସ୍ମିତା ବାଭୀ
Comments
ସୁସ୍ମିତା ବାଭୀ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
