କିଛି ସତ ଲୁଚି ରହିବା ଭଲ
ଆଖି କଣରେ ଅଶ୍ରୁ ଆଢ଼ୁଆଳରେ ହଉ
କିମ୍ବା ଓଠ ତଳ ହସର ଓଢ଼ଣା ତଳେ
କିଛି ସତ ଲୁଚି ରହିବା ଭଲ ।
କବିର ହୃତସ୍ପନ୍ଦନରେ ଯାହା ତା’
ଲେଖନୀ ମୁନରେ ଜୀବନ୍ତ ହବା ଅପେକ୍ଷାରେ ହଉ
କିମ୍ବା ଶିଳ୍ପୀର ତୁଳି ଅଗରେ ଯାହା କାହାଣୀଟେ
କହିବାର ଅପେକ୍ଷାରେ, ତା’ ଛବିର ପ୍ରତିବିମ୍ବରେ
କିଛି ସତ ଲୁଚି ରହିବା ଭଲ ।
ଅମାବାସ୍ୟା ରାତିର ନୀରବ ଅନ୍ଧକାରରେ
ଶ୍ୱାନ ଶ୍ୱାପଦଙ୍କ ବିକଟାଳ ରଡ଼ିରେ ହଉ
କିମ୍ବା ପୂର୍ଣ୍ଣିମା ଜହ୍ନର ରୂପେଲି ଜ୍ୟୋସ୍ନାରେ
କଇଁ ଫୁଲଟିଏ ହୋଇ ଫୁଟିବା ଅପେକ୍ଷାରେ
କିଛି ସତ ଲୁଚି ରହିବା ଭଲ ।
ଆକାଶର ବିଶାଳ ବକ୍ଷରେ ସୂର୍ଯ୍ୟଟିଏ ହୋଇ
ନିଇତି ସକାଳୁ ଉଇଁବାର ବିଶ୍ୱାସରେ ହଉ
କିମ୍ବା ସୂର୍ଯ୍ୟାସ୍ତ ପରେ ତାରାଟିଏ ହୋଇ
ଆକାଶର ଏକାପଣକୁ ଦୂର କରିବାର ଭରସାରେ
କିଛି ସତ ଲୁଚି ରହିବା ଭଲ ।
ଝଡ଼ ବତାସରେ ବୁଢ଼ା ବରଗଛ ପରି ଅଣ୍ଟା ସଳଖି
ଛାତି ଦେଖେଇ ଛିଡ଼ା ହବାର ଦମ୍ଭରେ ହଉ
କିମ୍ବା କୂଳରୁ ଭସାଇ ନେଇଥିବା ଜିନିଷକୁ କୂଳକୁ
ଫେରେଇ ଦବାର ସମୁଦ୍ରର ସ୍ୱାଭିମାନରେ
କିଛି ସତ ଲୁଚି ରହିବା ଭଲ ।
– ଚିନ୍ମୟ କୁମାର ସାହୁ
Comments
ଚିନ୍ମୟ କୁମାର ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ଆଦି ରଚନା କରନ୍ତି । ତାଙ୍କ ରଚିତ ଅନେକ ଗୁଡ଼ିଏ ଗପ, କବିତା ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ।
