ଜୀବନ ଜିଜୀବିଷା
ଖୋଜୁଥାଏ ଅହର୍ନିଶ
ଭଲ ପାଇବାର ଦରୋଟି ଭାଷା
ପ୍ରେମରେ ପୂର୍ଣ୍ଣତା ହିଁ
ଜାଗ୍ରତ କରେ ବିଶ୍ୱାସ ଓ ଆସ୍ଥା
ନୂତନ ସମ୍ଭାବନାର ଆଶା ।
ବାସନା ଭରା ପ୍ରେମ
ଅବା ଲୋଲୁପତାର
ଆୟୁଷ ବା କେତେ?
ଅପଲକେ ଧରାଶାୟୀ ହୁଏ
ଧୂମକେତୁ ପରି,
ଅକ୍ଷମ ଆବେଗମାନେ ଛଟପଟ ହୁଅନ୍ତି
ବାସି ବିଛଣାରେ…
ପ୍ରତାରଣାର ଆଘାତରେ ବ୍ୟାପ୍ତ ହୁଏ
ଆକାଶ ଉନ୍ମୁଖି ପ୍ରଲମ୍ବିତ ତିମିରତା ।
ଫଗୁଣର ସ୍ୱପ୍ନ ସବୁ
ଉର୍ବଶୀର ଗାଁରେ
ପାଲଟି ଯାଆନ୍ତି
ଲୁହର ଚିରସ୍ରୋତା ଉଷ୍ମ ପ୍ରସ୍ରବଣ ।
ଆଖି ଯେବେ ପରଖି ପାରେନି
ପ୍ରେମର ସ୍ଥିତିଗତି… ହୃଦୟର ଚିତ୍ତବୃତ୍ତି
ପ୍ରେମ ପୃଥିବୀରେ ପ୍ରେମରେ ପ୍ରେମରେ
ଘଟିଯାଏ ଅପରାଧ
ପ୍ରେମର ଅଦ୍ୟ ସ୍ତବକରେ
ଏଣୁ ଲେଖିଦିଅ “କେବଳ ଶାଶ୍ୱତ”
ଉଭେଇଯିବ ଧରିତ୍ରୀର ଯେତେ ସବୁ କୋହ
ଏ ଧରା ହେବ ମଧୁମୟ,
ଜାଗିଉଠିବ ଜିଜୀବିଷା
ନଥିବ କିଛି ସଂଶୟ ଅବା ଭୟ ।
– ସବିତା ଶତପଥୀ
Comments
ସବିତା ଶତପଥୀ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
