କାହିଁକି ଖେଳୁଛ ନାରୀଙ୍କ ଦେହରେ
କି ଲାଭ ତୁମେ ବା ପାଉଛ,
ମାଂସ ଲୋଭୀ ତୁମେ ରାକ୍ଷସ ସାଜିଣ
ଅନ୍ୟର ଜୀବନ ନେଉଛ ।
କାମନାରେ ତୁମେ ବଶବର୍ତ୍ତୀ ହୋଇ
କାହିଁକି ଇଜ୍ଜତ ଲୁଟୁଛ,
ଆଉ କାହା ଦେହେ କଳଙ୍କ ଲଗେଇ
କି ସୁଖ ତୁମେ ବା ପାଉଛ ।
ନାରୀ ଅଟେ ମାଆ ସିଏ ବି ଭଗିନୀ
ଏକଥା କି ଭୁଲି ଯାଉଛ,
ସହଧର୍ମିଣୀ ଯେ ଅଟେ ସେହି ନାରୀ
ଜୀବନ ଯା ସାଥେ କାଟୁଛ ।
ସେହି ନାରୀଠାରୁ ସେନେହ ମମତା
ପ୍ରୀତି ଓ ପ୍ରେରଣା ପାଉଛ,
ହେଲେ ପୁଣି ତୁମେ କାମୁକଟେ ସାଜି
ଦେହ ସାଥେ ତା’ର ଖେଳୁଛ ।
କାହାକୁ କାହିଁକି ନିର୍ଯ୍ୟାତନା ଦେଇ
ଧର୍ଷଣ କାହାକୁ କରୁଛ,
କାହା ମୂଲ୍ୟବାନ ଜୀବନରେ କାହିଁ
ମୃତ୍ୟୁର କାରଣ ସାଜୁଛ ।
କାମନାଟା ସିନା ପାପ ନୁହେଁ ଏଠି
କାହିଁକି ପାପୀଟେ ସାଜୁଛ,
କ୍ଷଣିକ ଆନନ୍ଦେ ଆଉ କା’ ଦେହରେ
କଳଙ୍କ କାହିଁକି ବୋଲୁଛ ।
ପୁଣ୍ୟଭୂମି ଏହି ଭାରତ ବର୍ଷରେ
ପାପୀରେ ଯେ ଗଣା ହେଉଛ,
କାହା ଜୀବନକୁ ନର୍କ କରିଦେଇ
ନିଜେ ବି ନର୍କକୁ ଯାଉଛ ।
ନାରୀ ବିନା ଏଠି ପୁରୁଷ ବଞ୍ଚେନା
ଏକଥା କି ଭୁଲି ଯାଉଛ,
ନାରୀ ଯେ ମହାନ ଦିଅ ହେ ସମ୍ମାନ
କାହିଁ ଆସମ୍ମାନ କରୁଛ ।
Comments
ପ୍ରଶାନ୍ତ କୁମାର ନାଥ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
