ମଘା ନକ୍ଷତ୍ରରେ ମାଘ ଆସିଲା ।
ମକର ସଂକ୍ରାନ୍ତି ଦେଖି ହସିଲା ॥
ମକର ରାଶିରେ ସୂର୍ଯ୍ୟଙ୍କ ସ୍ଥିତି ।
ମକର ସଂକ୍ରାନ୍ତି ଫୁଲାଏ ଛାତି ॥
ସୂର୍ଯ୍ୟ ଅବସ୍ଥାନ ମକର କ୍ରାନ୍ତି ।
ତେଣୁ ଏ ତିଥି ମକର ସଂକ୍ରାନ୍ତି ॥
ଦକ୍ଷିଣ ଅୟନ ଗତି ସରିଲା ।
ଉତ୍ତର ଅୟନ ଆରମ୍ଭ ହେଲା ॥
ଏଣିକି ଶୀତର ଦାଉ କମିବ ।
ଖରାର ପ୍ରକୋପ ଏବେ ବଢ଼ିବ ॥
ଦିନ ବଢ଼ି ରାତି ଛୋଟ ହୋଇବ ।
ଏତେ ଲମ୍ବା ରାତି କିଏ ଶୋଇବ??
ମକର ସଂକ୍ରାନ୍ତିରେ ପଡ଼େ ଚହଳ ।
ମଠ, ମନ୍ଦିରରେ ଭାରି ଗହଳ ॥
ଆଦିବାସୀ ଭାଇଭଉଣୀ ମିଶି ।
ପରବ ପାଳନ୍ତି ହୋଇଣ ଖୁସି ॥
ମକର ଚାଉଳ ଲାଗିବ ଭୋଗ ।
ଦିଅଁ ଦରଶନ ମିଳିବ ଯୋଗ ॥
ମକର ଚାଉଳ ଖୋଇ ଆନକୁ ।
ମକର ବସିବା ଏହି ସନକୁ ॥
ଫକୀର ମୋହନ ଏହି ଦିବସେ ।
ଜନ୍ମ ଲଭିଥିବା କଥାଟି ଆସେ ॥
କରିଲେ ଓଡ଼ିଆ ଭାଷାର ସେବା ।
ବ୍ୟାସକବି ଭାବେ ସମ୍ମାନ ଦେବା ॥
ପୋଙ୍ଗଲ ନାମରେ ମକର ପର୍ବ ।
ପାଳନ ହୁଅଇ ଆଣଇ ଗର୍ବ ॥
ଆସନ୍ତୁ ମକର ପର୍ବ ପାଳିବା ।
ସବୁ ବିଭେଦତା ଆମେ ଟାଳିବା ॥
– ନିରଞ୍ଜନ ସାହୁ
Comments
ନିରଞ୍ଜନ ସାହୁ
ନିରଞ୍ଜନ ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
