୨୦୧୬ ମସିହାର ସାର୍ଥକ ଟିଭିରେ ପ୍ରସାରିତ ରିୟାଲିଟି ଶୋ ରଜ କୁଇନ୍ର ବିଜେତା ହୋଇଥିଲେ ଜାଙ୍କଲିନ୍ ପରିଡ଼ା । ପରବର୍ତ୍ତୀ ସମୟରେ ସେ ସାର୍ଥକ ଟିଭିରେ ପ୍ରସାରିତ ଧାରାବାହିକ ମୋ ଜେଜେମାରେ ରିୟା ଭୂମିକାରେ ଅଭିନୟ କରିଥିଲେ । ଦୂରଦର୍ଶନରେ ଅଭିନୟ ସାଙ୍ଗକୁ ସେ ବିଭିନ୍ନ ଆଲବମ୍ରେ ଅଭିନୟ କରିଛନ୍ତି । ଏହି କଳାକାରଙ୍କୁ ଆମେ ପଚାରିଥିଲୁ କେତୋଟି ପ୍ରଶ୍ନ; ଚାଲନ୍ତୁ ଦେଖିବା ସେ ତା’ର ଉତ୍ତରରେ କ’ଣ କହୁଛନ୍ତି ।
ପ୍ରଶ୍ନ ୧. ଓଡ଼ିଆ ଦୂରଦର୍ଶନ ଦୁନିଆରେ ପ୍ରଥମ ଯମଜ କଳାକାର ଆପଣ ଆଉ ସୋମାଲିନ୍ । ଏହାକୁ ଆପଣଙ୍କର ପ୍ରସଂଶକମାନେ କେମିତି ଗ୍ରହଣ କରୁଛନ୍ତି?
ଉତ୍ତର: କହିବାକୁ ଗଲେ ଆମେ ଯେବେଠାରୁ ଏହି ରିୟାଲିଟ୍ ଶୋରେ ଅଂଶଗ୍ରହଣ କରିବା ଆରମ୍ଭ କରିଥିଲୁ ପରିଚାଳକମାନଙ୍କଠାରୁ ଆରମ୍ଭ କରି ଦର୍ଶକମାନଙ୍କ ପର୍ଯ୍ୟନ୍ତ ସମସ୍ତେ ଆମର ପ୍ରଶଂସା କରିଆସୁଛନ୍ତି । ଆମର ଏହି ବଣ୍ଡିକୁ ସମସ୍ତେ ଭଲରେ ଗ୍ରହଣ କରିବା ସହ ଅନେକ ଭଲ ପାଇବା ଦେଇଛନ୍ତି । ଏବେ ବି ଅନେକ ସ୍ଥାନରେ ଜଣଙ୍କୁ ଏକୁଟିଆ ଦେଖିଲେ ଆଉଜଣେ କୁଆଡ଼େ ଗଲା ବୋଲି ଖୋଜୁଛନ୍ତି; ଯେମିତିକି ଆମେ ଦୁଇଜଣ ନୁହେଁ ଜଣେ ।
ପ୍ରଶ୍ନ ୨. ଆପଣ ରଜ କୁଇନ୍ ଜରିଆରେ ପ୍ରଥମେ ଲୋକଲୋଚନକୁ ଆସିଲେ, ସେତେବେଳେ ଆପଣଙ୍କର ଅନୁଭୂତି କେମିତି ଥିଲା?
ଉତ୍ତର: ରଜକୁଇନ୍ରେ ଆମର ଅଡ଼ିସନ୍ ଯେବେ ଟେଲିକାଷ୍ଟ ହେଲା, ସେତେବେଳେ ସାରା ଓଡ଼ିଶା ଆମ ଦୁହିଁଙ୍କ ବିଷୟରେ ଜାଣିବାକୁ ପାଇଲା ଆଉ ପରବର୍ତ୍ତୀ ସମୟରେ ଶୋ’ ଶେଷ ହେବା ଭିତରେ ଅନେକ ପ୍ରଶଂସା ମିଳୁଥିଲା । ଏଥିନିମନ୍ତେ ଧନ୍ୟବାଦ ଜଣେଇବି ରଜକୁଇନ୍ର ସଂଯୋଜକ ଏବଂ ସମ୍ପୂର୍ଣ୍ଣ ଟିମ୍କୁ ତା’ ସହିତ ସାର୍ଥକ ଟିଭିକୁ, ସେମାନଙ୍କର ଏହି କାର୍ଯ୍ୟକ୍ରମ ପାଇଁ ଆମେ ଦୁହେଁ ଲୋକଲୋଚନକୁ ଆସିପାରିଲୁ ।
ପ୍ରଶ୍ନ ୩. ମାତ୍ର ଦୁଇମାସର ଯାତ୍ରା ଥିଲା ରଜ କୁଇନ୍ର ଫାଇନାଲ୍ରେ ପହଞ୍ଚିବା ଆଉ ବିଜୟୀ ହେଲାପରେ କିଛି ଅଲଗା ଅନୁଭବ କରିଥିଲେ ନା ପୂର୍ବରୁ ସମସ୍ତେ ଯେମିତି ଆପଣଙ୍କୁ ଦେଖୁଥିଲେ, ତା’ପରେ ବି ସେମିତି ଗ୍ରହଣ କରିଥିଲେ?
ଉତ୍ତର: ହଁ ସେ ଦୁଇମାସର ଯାତ୍ରା ଭିତରେ ବାକି କିଛି ବଦଳିନଥିଲା, କିନ୍ତୁ ଲୋକମାନଙ୍କର ଭଲପାଇବାଟା ବହୁତ ବଦଳିଯାଇଥିଲା । ଆଖପାଖର ଲୋକମାନେ ଆଗରୁ ଯେମିତି ଭଲ ପାଉଥିଲେ, ପରେ ସେ ଭଲପାଇବାଟା ଅଧିକ ବଢ଼ିଯାଇଥିଲା । ଭଲ ପାଇବା ଯେମିତି ବଢ଼ିଥିଲା ଚିହ୍ନିଥିବା ଲୋକଙ୍କର ସଂଖ୍ୟା ବି ବହୁତ ବଢ଼ିଯାଇଥିଲା । କେହି କେହି ବାଟରେ ଦେଖିଲେ ଏମିତି କଥାବାର୍ତ୍ତା କରୁଥିଲେ କି ଯେମିତି ସେମାନେ ଆମ ପରିବାର ଲୋକଙ୍କ ଭଳିଆ ଆମକୁ ବହୁତ ଭଲ ଭାବରେ ଜାଣିଛନ୍ତି ।
ପ୍ରଶ୍ନ ୪. ରଜ କୁଇନ୍ ପରେ ଆପଣ ସାର୍ଥକ ଟିଭିର ଧାରାବାହିକରେ ଅଭିନୟ କରିଥିଲେ ଆଉ ତାହା ବି ନେଗେଟିଭ୍ ରୋଲ୍ରେ । ପ୍ରଥମ ସୁଯୋଗର ଅନୁଭୂତି କ’ଣ ଥିଲା?
ଉତ୍ତର: ହଁ ପ୍ରଥମ ଅଫର୍ ପାଇଁ ମୁଁ ବହୁତ ଖୁସି ଥିଲି । ଆଉ ନେଗେଟିଭ୍ କି ପଜେଟିଭ୍ ମୁଁ ସେମିତି ଦେଖେନି, ମୋତେ ଅଭିନୟ କରିବାର ଅଛି; ତାହା ମୁଁ ଦେଖେ । ତା’ଛାଡ଼ା ଅଭିନୟରେ ଯେ କୌଣସି ଚରିତ୍ରରେ ଅଭିନୟ କଲେ ବି ସେ ଚରିତ୍ରକୁ ଭଲ ଭାବରେ ବୁଝି ତାକୁ ପରଦାରେ ନିଭେଇବା ଏକ କଳା । ଯେହେତୁ ଏହା ମୋର ପ୍ରଥମ ଅଭିନୟ ଥିଲା ଆଉ ଏହା ପୂର୍ବରୁ ଅଭିନୟର ଆଦୌ ଅଭିଜ୍ଞତା ନଥିଲା । ତେଣୁ ପ୍ରଥମେ ପ୍ରଥମେ ମୋ ପାଇଁ ଟିକେ ଟିକେ ଅସୁବିଧା ହୋଇଥିଲା; ଅବଶ୍ୟ ପରେ ଧୀରେ ଧୀରେ ଅଭିନୟ କରିବା ଭିତରେ ତା’ ସହ ଯୋଡ଼ିହୋଇଥିବା ବିଭିନ୍ନ କଳା ବିଷୟରେ ଶିଖିଲି । ଏହି ଚରିତ୍ର ପାଇଁ ମୋର ଅଭିନୟର ଶୈଳୀକୁ ଲୋକମାନେ ମଧ୍ୟ ବହୁତ ଭଲପାଇବା ଦେଇଥିଲେ ।
ପ୍ରଶ୍ନ ୫. ପରେ ପରେ ଆପଣ ଦୁଇଜଣ ଏକ ଆଲବମ୍ରେ ଅଭିନୟ କରିଥିଲେ, ଯେଉଁଥିରେ ଆପଣଙ୍କ ସ୍ଥାନରେ ସୋମାଲିନ୍ ନିଜକୁ ବଦଳାଇଦେଇଥିଲେ । ବ୍ୟକ୍ତିଗତ ଜୀବନରେ କେବେ ସେମିତି କରିଛନ୍ତି କି?
ଉତ୍ତର: ହଁ ଲିପ୍ସା ମିଶ୍ରଙ୍କ ପ୍ରଡକ୍ସନର ପ୍ରଥମ ଆଲବମ୍ ଟୁଇନ୍ସ୍ରେ ଆମେ ଦୁଇଜଣ ଏକାସାଙ୍ଗରେ ଅଭିନୟ କରିଥିଲୁ । ତାହା କେବଳ ଅଭିନୟ ପାଇଁ ଥିଲା; ବ୍ୟକ୍ତିଗତ ଜୀବନରେ ଆମେ ଆଦୌ ସେମିତି ନୁହେଁ, ଆମ ଭିତରେ ବହୁତ ଭଲ ପାଇବା ଅଛି, ଦୁହେଁ ପରସ୍ପରକୁ ବହୁତ ଭଲ ଭାବରେ ଜାଣିଛୁ । ତା’ଛଡ଼ା ଯଦି କେବେ ମୁଁ ସୋମାଲିନ୍ ସ୍ଥାନରେ କେଉଁଠିକି ଏବେ ଯିବି ଲୋକମାନେ ସଙ୍ଗେ ସଙ୍ଗେ ଜାଣିଯିବେ, କାରଣ ସେମାନେ ଏବେ ଆମକୁ ବହୁତ ଭଲ ଭାବରେ ଜାଣିଗଲେଣି ।
ପ୍ରଶ୍ନ ୬. ଆଗାମୀ ଦିନରେ ଓଡ଼ିଆ କଥାଚିତ୍ର ଜଗତରେ ଅଭିନୟ କରିବାର ଯୋଜନା ଅଛି କି? ସେଥିପାଇଁ ନିଜକୁ କିଛି ପ୍ରସ୍ତୁତ କରୁଛନ୍ତି କି?
ଉତ୍ତର: ଅଗାମୀ ଦିନ କଥା ତ ଜଣା ନାହିଁ କିନ୍ତୁ ହଁ ଇଚ୍ଛା ତ ବହୁତ ଅଛି ଆଉ ଅଭିନୟ ଏବଂ ରିଆଲିଟି ଶୋ’ ପାଇଁ ହିଁ ମୋତେ ଲୋକମାନେ ଚିହ୍ନିଛନ୍ତି, ତେଣୁ ତାକୁ ଛାଡ଼ିବାର ପ୍ରଶ୍ନ ହିଁ ଉଠୁନି । ମୁଁ ମୋ ଜୀବନରେ କୌଣସି କାର୍ଯ୍ୟରେ ଯେତେ ବି ବ୍ୟସ୍ତ ଥାଏନା କାହିଁକି ଅଭିନୟର ସୁଯୋଗ ମିଳିଲେ ମୁଁ ନିଶ୍ଚୟ କରିବି ।
ପ୍ରଶ୍ନ ୭. ପାଠପଢ଼ା ଆଉ ଅଭିନୟ ମଧ୍ୟରେ ଆପଣ କେମିତି ସନ୍ତୁଳନ ରକ୍ଷା କରନ୍ତି?
ଉତ୍ତର: ମୋ ହିସାବରେ କାମ ଯାହା ବି କରନ୍ତୁ ନା କାହିଁକି ପାଠପଢ଼ା ସବୁବେଳେ ଜାରି ରଖିଥାନ୍ତୁ । ଅଭିନୟ ପାଇଁ କିମ୍ବା ମୋର ଅନ୍ୟାନ୍ୟ କାମ ପାଇଁ ଯେମିତି ମୋ ପାଠପଢ଼ାରେ କୌଣସି ଅସୁବିଧା ନ ହେଉ ସେଥିପ୍ରତି ମୁଁ ସବୁବେଳେ ଧ୍ୟାନ ଦେଇଥାଏ । କଟକରେ ପଢ଼ୁଥିବାବେଳେ ମୁଁ ଯେମିତି ମୋ କାମସହ ପାଠପଢ଼ାରେ ସନ୍ତୁଳନ ରକ୍ଷା କରୁଥିଲି, ଏଇଠି ପଞ୍ଜାବରେ ବି ସେମିତି ପାଠପଢ଼ା ଠିକ୍ରେ ଚାଲିଛି । ମୁଁ ମୋ କାର୍ଯ୍ୟ ଏବଂ ପଢ଼ା ଭିତରେ ଭଲ ସନ୍ତୁଳନ ରକ୍ଷା କରିପାରିଛି, ଯେଉଁଥିପାଇଁ ମୁଁ ସବୁବେଳେ ଖୁସି ଅନୁଭବ କରେ ।
ପ୍ରଶ୍ନ ୮. ଜାଙ୍କଲିନ୍ଙ୍କ ପାଇଁ ପ୍ରେମର ସଜ୍ଞା କ’ଣ? ପ୍ରେମକୁ ସେ କେମିତି ବୁଝନ୍ତି?
ଉତ୍ତର: ପ୍ରେମ ଏକ ବିଶାଳ ସାଗର ସଦୃଶ, ଏହାକୁ ବର୍ଣ୍ଣନା କରିବା ମୋ ପାଇଁ ସତରେ କଷ୍ଟକର । ପ୍ରେମ କେତେବେଳେ କାହା ସହ ହେବ କହିହେବ ନାହିଁ । ଆଉ ପ୍ରେମ ଯେ କେବଳ ପ୍ରେମିକ-ପ୍ରେମିକା ଭିତରେ ସୀମିତ, ତାହା ନୁହେଁ ଏହା ବାପାମାଆ, ଭାଇଭଉଣୀ, ସାଙ୍ଗସାଥୀଙ୍କ ପାଇଁ ବି ଥାଏ । ତେଣୁ ମୋ ହିସାବରେ ଏହାର ସେମିତି ନିର୍ଦ୍ଦିଷ୍ଟ ସଜ୍ଞା କିଛି ନାହିଁ ।
ପ୍ରଶ୍ନ ୯. ଆଗକୁ ଭାଲେଣ୍ଟାଇନ୍ ଡେ ଆସୁଛି, ଏହା ଉପରେ ଯୁବପିଢ଼ୀଙ୍କ ଉଦ୍ଦେଶ୍ୟରେ ଆପଣ କ’ଣ କହିବେ?
ଉତ୍ତର: ଯୁବପିଢ଼ୀଙ୍କୁ ଗୋଟିଏ କଥା କହିବି କି ଆପଣମାନେ ଯାହାକୁ ଭଲ ପାଉଛନ୍ତି, ପ୍ରଥମେ ତାକୁ ସମ୍ମାନ ଦେବା ଶିଖନ୍ତୁ । କାରଣ ସମ୍ମାନ ନ ଦେଲେ ସମ୍ମାନ ମିଳିବନି ଆଉ ଯେଉଁ ପ୍ରେମରେ ସମ୍ମାନ ନଥାଏ, ତାକୁ ପ୍ରେମ କୁହାଯାଏ ନାହିଁ । ଦ୍ୱିତୀୟରେ କହିବି କି ଆପଣମାନେ ଆପଣଙ୍କର ପ୍ରେମକୁ ବିଶ୍ୱାସ କରନ୍ତୁ ଏବଂ କେବେ ଛଳନା କରିବାର ଉଦ୍ଦେଶ୍ୟ ରଖି ପ୍ରେମ କରନ୍ତୁ ନାହିଁ, ଏମିତି ହେଲେ ସେ ପ୍ରେମ ବେଶିଦିନ ତିଷ୍ଠିପାରିନାହିଁ; କାରଣ ଚୋର ଘର ସବୁବେଳେ ଅନ୍ଧକାରରେ ନଥାଏ । ଏହି ଭାଲେଣ୍ଟାଇନ୍ରେ ନିଜର ପ୍ରେମକୁ ସମ୍ନାନର ସହ ପାଳନ କରନ୍ତୁ ଏବଂ ପ୍ରେମ କରୁଥିବା ଲୋକଟି ସହ ଭଲରେ ଭଲରେ ପାଳନ କରନ୍ତୁ ।
ପ୍ରଶ୍ନ ୧୦. ଓଡ଼ିଶାରେ ଏବେ ଯେମିତି ପ୍ରେକ୍ଷାଳୟର ହ୍ରାସ ଘଟୁଛି, ଦର୍ଶକମାନେ ଧୀରେ ଧୀରେ ଓଡ଼ିଆ କଥାଚିତ୍ର ପ୍ରତି ଆକୃଷ୍ଟ ହେଉନାହାନ୍ତି । ଜଣେ ଓଡ଼ିଆ ଅଭିନେତ୍ରୀ ହିସାବରେ ଓଡ଼ିଶାର ଦର୍ଶକଙ୍କ ପାଇଁ କ’ଣ ମନ୍ତବ୍ୟ ରଖିବେ?
ଉତ୍ତର: ହଁ ଓଡ଼ିଆ ଚଳଚ୍ଚିତ୍ର ଜଗତରେ ସେମିତି ଭଲ କାହାଣୀର ଫିଲ୍ମ ଆସୁନି ଯାହା ଆମର ଦର୍ଶକମାନଙ୍କୁ ଆକୃଷ୍ଟ କରିପାରିବ । ହୁଏତ ସେହିସବୁ କାହାଣୀପାଇଁ ଆଜି ପ୍ରେକ୍ଷାଳୟଗୁଡ଼ିକର ଏମିତି ଦୁର୍ଦଶା । ତା’ଛଡ଼ା ଏବେ ଡିଜିଟାଲ୍ ଯୁଗରେ ଲୋକମାନେ ସହଜରେ ବିଭିନ୍ନ କାହାଣୀର ଫିଲ୍ମ ଦେଖୁଛନ୍ତି ଆଉ ପୁଣିଥରେ ସେହି କାହାଣୀକୁ ଦେଖିବାକୁ ଫିଲ୍ମ ହଲ୍କୁ ଯିବାକୁ ପସନ୍ଦ କରୁନାହାନ୍ତି । ଯେଉଁଦିନ ନିଜସ୍ୱ ସ୍ୱାର୍ଥ ଛାଡ଼ି ନିର୍ମାତାମାନେ ଆମ କଥାଚିତ୍ର ଜଗତ ପାଇଁ ଚଳଚ୍ଚିତ୍ର ନିର୍ମାଣ କରିବା ଆରମ୍ଭ କରିବେ, ସେବେ ପିଲାଠୁ ବୁଢ଼ା ସମସ୍ତ ତାକୁ ଭଲ ପାଇବେ ବୋଲି ମୋତେ ଲାଗୁଛି ।
(ଜାଙ୍କଲିନ ତାଙ୍କର ବହୁମୂଲ୍ୟ ସମୟ ଦେଇଥିବାରୁ ତାଙ୍କୁ ଶୁଭପଲ୍ଲବ ପରିବାର ତରଫରୁ ଧନ୍ୟବାଦ ଜଣାଉଛୁ ଆଉ ତାଙ୍କର ଆଗାମୀ ଭବିଷ୍ୟତ ଜୀବନ ପାଇଁ ଶୁଭକାମନା ଜଣାଉଛୁ ।)
Comments
ସଂଗ୍ରାମ କେଶରୀ ସେନାପତି, ଶୁଭପଲ୍ଲବ ଓଡ଼ିଆ ଇ-ପତ୍ରିକାର ପ୍ରତିଷ୍ଠାତା ତଥା ସମ୍ପାଦକ । ସେ ଓଡ଼ିଆରେ ଗଳ୍ପ, ପ୍ରବନ୍ଧ ଆଦି ଲେଖାଲେଖି କରନ୍ତି ଏବଂ ଓଡ଼ିଆ ଉଇକିମିଡ଼ିଆର ବିଭିନ୍ନ ପ୍ରକଳ୍ପରେ ପ୍ରାୟତଃ କାର୍ଯ୍ୟ କରନ୍ତି ।
