କିଏ କହିଲା
କ୍ରୀତଦାସର ବେଡ଼ି ଖୋଲି ଯାଇଛି
ପାଦର ଶୃଙ୍ଖଳ ଛିଡ଼ି ଯାଇଛି,
ତା’ର ନିର୍ଯ୍ୟାତନା, ଯନ୍ତ୍ରଣା, ଯାତନା
ସରିଯାଇଛି?
ପେଟ କାକୁର୍ତ୍ତିରେ
ଭିଟାମାଟିକୁ ଛାଡ଼ି
ଦାଦନ ଖଟିବାକୁ ଯାଇ,
ପ୍ରାଣ ନେଇ ଫେରିଥିବା
ସେଇ କଙ୍କାଳସାର ମଣିଷକୁ ଦେଖ !
ସେଇ ନିର୍ଯ୍ୟାତନା,
ସେଇ ଯନ୍ତ୍ରଣା ଯାତନାର ଛାପ
ଦିକ୍ ଦିକ୍ ହୋଇ ଦିଶୁଛି ।
ଲୋମହର୍ଷଣକାରୀ କରୁଣ
ଅନୁଭୂତିର ଚିହ୍ନ
ସ୍ପଷ୍ଟ ବାରି ହୋଇ ପଡ଼ୁଛି
ତା’ର ପେଟ ଆଉ ପିଠିରୁ ।
ଦେଖ ! ତା’ର ସାଙ୍କୁଡ଼ି ଯାଇଥିବା ମୁହଁକୁ
କୋରଡ଼ରେ ବନ୍ଦୀ ନିସ୍ତେଜ ଆଖିକୁ ।
ମୁଠାଏ ଖୁସି ହାତେଇବ କ’ଣ,
ବରଂ ହଜେଇ ଆସିଛି ତା’ର ଉଦ୍ଦାମ ଯୌବନ
ହଜେଇ ଆସିଛି
ଲାଉତୁମ୍ବାରେ ତୁମ୍ବେ
ମାଣ୍ଡିଆ ଜାଉର ସ୍ଵପ୍ନ ।
ସେ କ’ଣ କେବେ
ସ୍ଵପ୍ନରେ ବି ଭାବିଥିଲା
ଏ ସମୟ ତାକୁ ସଜେଇ ଦେବ ପଳାତକ ?
ପଳାୟନରୁ….. ପ୍ରତ୍ୟାବର୍ତ୍ତନ
ପ୍ରତ୍ୟାବର୍ତ୍ତନରୁ ଥଇଥାନ
ଏ ସବୁ ପ୍ରଶାସନର
ପ୍ରହସନ ନୁହଁ ତ ଆଉ କ’ଣ?
ପୁଣି ସେହି
ହାହାକାରମୟ ଜୀବନର ପୁନରାବୃତ୍ତି
ମୁଠେ ଦାନା ଖଣ୍ଡେ କନା ପାଇଁ
ମୁଣ୍ଡ ଗୁଞ୍ଜିବା ପାଇଁ
ଯେଉଁ କାକୁର୍ତ୍ତିକୁ ସେହି କାକୁର୍ତ୍ତି ।
ତଥାପି ଆଶ୍ଵସ୍ତି !
ଏଇଥିପାଇଁ ଯେ
ମାଫିଆଙ୍କ ହାତରେ କଟି ଯାଇନି
ହାତ କି ପାପୁଲି !
ବରଂ ଅଳ୍ପକେ ସେ ଯାଇଛି ବର୍ତ୍ତି ।
– ସବିତା ଶତପଥୀ
Comments
ସବିତା ଶତପଥୀ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
