କେବେ କେବେ ସବୁଜ ବଳୟ ମଧ୍ୟରେ
ସ୍ୱପ୍ନର ନାୟିକା ସନ୍ଧାନରେ ।
କେବେ ପୁଣି ଚିରସ୍ରୋତା ନଦୀର କୂଳରେ
ପାଗଳ ପ୍ରାୟ ମୁଁ ଭ୍ରମେରେ ॥
ସକାଳ ଖରାର କୋମଳ ତାତିରେ
ତା’ରି ଉଷ୍ମତା ଅନୁଭବ କରେ ।
ମଳୟ ପବନରେ ଶୀତଳ ସ୍ପର୍ଷରେ
ତା’ରି ସୁଗନ୍ଧ ମୁଁ ବାରିପାରେ ॥
କେବେ କେବେ ପହାଡ଼ର ପାଦ-ଦେଶରେ
ମୋ ସାଥେ ଚାଲେ ସେ ଏକାନ୍ତରେ ।
କେବେ ପୁଣି ଦୁର୍ଲଂଘ୍ୟ ସମୁଦ୍ର ତଟରେ
ଶାମୁକାର ମୋତି ଭଳି ସେ ଦିଶେରେ ॥
ମନ ଖୋଜେ ଯାହାକୁ ପ୍ରତିଟି ମୁହୂର୍ତ୍ତରେ ।
ସନ୍ଧାନର ସେହି ଉତ୍କଣ୍ଠା ମଧ୍ୟରେ ।
ଅନାମିକା ନାୟିକା ଯିଏ ମୋ ସ୍ୱପ୍ନରେ
ଉନ୍ମାଦିତ ମନ ମୋ ତାହାରି ସ୍ପର୍ଶରେ ॥
– ଗଗନ କୁମାର ପାଣିଗ୍ରାହୀ
Comments
ଗଗନ କୁମାର ପାଣିଗ୍ରାହୀ
ଗଗନ କୁମାର ପାଣିଗ୍ରାହୀ ଗଞ୍ଜାମ ଜିଲ୍ଲାରେ ଜନ୍ମଗ୍ରହଣ କରିଥିଲେ । ସେ ବିଚାର ବିଭାଗର କିରାଣୀ ଭାବରେ ଅଧୁନା କାର୍ଯ୍ୟରତ ଅଛନ୍ତି । ଗଗନ ତାଙ୍କ ଫାଙ୍କା ସମୟରେ ଓଡ଼ିଆରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଲେଖାଗୁଡ଼ିକ ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ଏବଂ ତାଙ୍କର ଅନେକ ପାଠକୀୟ ଆଦୃତା ରହିଛି ।
