ହେଲା ଯେବେ ତୁମ ସହ ଦେଖା ପରେ ଦେଖା,
ତୁମ ସୁଧାମୁଖ ପ୍ରସାରଣ କରିଲେ ସୁରେଖା,
କେମିତି ବ୍ୟାଖ୍ୟାନ କରିବି ତୁମ ରୂପରେଖା,
ଆକର୍ଷକ ତୁମ ଲାବଣ୍ୟ ଲୋଚନରେ କଜ୍ଜ୍ୱଳରେଖା |୧|
ଲେଖୁଛି ତୁମ ପାଇଁ ଏହି ପ୍ରେମଲେଖା,
ଯାହା ମୋ ମନୋଗତିର ମଦନଲେଖା,
ଭାନୂଦୟ ବେଳର ଭାନୁରେଖା,
ଚନ୍ଦ୍ରୋଦୟ କାଳର ଚନ୍ଦ୍ରରେଖା |୨|
ଲେଖି ଚାଲିବି ଏହି ପ୍ରଥମ ପ୍ରେମପତ୍ର ,
ତୁମ ଅନୁରାଗ ହେଲା ମୋର ପ୍ରିୟମିତ୍ର,
କର ମୋତେ ନିଜର ପ୍ରଣୟସଖା ପ୍ରୀତିପତ୍ର,
ଶୀଘ୍ର ଦିଅ ତୁମ ସ୍ୱାକ୍ଷରିତ ଅଙ୍ଗୀକାର ପତ୍ର |୩|
ତୁମେ ଯେ ଦିବ୍ୟ ଦୀପର ଦୀପଶିଖା,
ହେବାକୁ ଚାହୁଁଛି ତୁମର ଦୀପରୁଖା,
ତୁମ ଶୁଭାଙ୍ଗ ଉଲ୍ଲେଖ କରୁଛି ମୋ ହାତଲେଖା,
ଆସି ବଦଳାଇ ଦିଅ ମୋ ଭାଗ୍ୟରେଖା |୪|
ଚାରୁଶୀଳ ଯେ ମୋର ଚନ୍ଦ୍ରଲେଖା,
ତୁମେ ମୋ ହସ୍ତରେଖାର ସୁଲେଖା,
କେବେ ଯେ ହେବ ମୋ ସୁରମ୍ୟ ସୁବର୍ଣ୍ଣରେଖା,
ଚକାଆଖିଙ୍କୁ ଦିଅ ଯିବା ଆମ ଆଦ୍ୟ କଲ୍ୟାଣ-ଲେଖା |୫|
– ଶ୍ରୀ ରାଜଶେଖର ସି ‘ଚିମା’
Comments
ରାଜ ଶେଖର ଶ୍ରୀ ଚିମା ଓଡ଼ିଆ ତଥା ତେଲୁଗୁ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
