ଚାନ୍ଦିନୀଭରା ଏହି ପୁନେଇ ରାତି,
ନିଦ ବିନା ଯାହା ମଧୁଭରା ରାତି,
ପ୍ରିୟାର ବିରହଭରା ଚପଳ ରାତି,
ଗାଏ ମୁଁ ପ୍ରେମଭରା ସୁରମ୍ୟ ଗୀତି |୧|
ମିଠା ଡଙ୍କ ମାରେ ଏ ଜହ୍ନ ରାତି,
ନଭ ନକ୍ଷତ୍ର ଦେଖି ବିତାଏ ରାତି,
ଚନ୍ଦ୍ରକାନ୍ତି ନେଲା ମୋର ମତିଗତି,
ଅତ୍ୟନ୍ତ ସୁଖପ୍ରଦ ପ୍ରେୟସୀର ପ୍ରୀତି |୨|
ପ୍ରେମିକା ଚିନ୍ତାରେ ଯାଏ ଦିନରାତି,
ଯାହାର ସ୍ମୃତି ଅନ୍ଧକାରରେ ବତି,
ଚାରୁ ଚନ୍ଦ୍ରାବତୀ ମୋ ପାଇଁ ବିଭୂତି,
ଲଳିତ ଲାବଣ୍ୟବତୀ ମୋର ସୁମତି |୩|
ଶୀତଳ ବେଳ ଚିତ୍ତରେ ଆଣେ ତାତି,
ହୃତ୍ସ୍ପନ୍ଦନ ଜଣାଏ ପ୍ରଣୟର ଅନୁଭୂତି,
ପ୍ରିୟତମାର ପ୍ରତୀକ୍ଷାରେ ନାହିଁ ବିରତି,
ଅଭୁଲା ଯେ ପୁନେଇ ରାତିର ପୀରତି |୪|
– ଶ୍ରୀ ରାଜଶେଖର ସି’ଚିମା’
Comments
ରାଜ ଶେଖର ଶ୍ରୀ ଚିମା ଓଡ଼ିଆ ତଥା ତେଲୁଗୁ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
