ପ୍ରତୀକ୍ଷା !
ଏକ ବିସ୍ତାରିତ ନିଃସଙ୍ଗ ପଥ,
ଆଉ…
ଏକ ଗଭୀର ଗହ୍ଵରରେ ଶୁଖିଲା ନଈ, ସଙ୍କୁଚିତ !
ସ୍ମୃତିର ବହଳ ପରତକୁ ଆଞ୍ଚୁଡ଼ିଲେ,
ବାରିହୁଏ କଣ୍ଠ ସ୍ୱରର ଆର୍ଦ୍ରତା…
ମନ୍ଦିରରେ ଜ୍ୱଳନ୍ତ ପ୍ରଦୀପ,
କମ୍ପୁଛି ଜୀବନ ସଳିତା !
ତକିଆରେ ଚାପି ହୋଇ
ନିସ୍ତବ୍ଧ ପଡ଼ିଛି ହିକ୍କା,
ଦୁଆରେ ଶବ୍ଦ !
ଥରୁଛି କଲିଜା…
ପ୍ରତୀକ୍ଷା !
ସେ ଯେ ରୋଦନ,
ଝାଉଁଳି ଯାଇଥିବା ଚେହେରାରେ,
ଖାରୁଆ ଲୁହର କ୍ଳାନ୍ତ ସମୁଦ୍ର…
ବିଶ୍ୱାସରେ ଶୀତଳ ପଡ଼ିଥିବା, ହୃଦୟର
ଅସଂଖ୍ୟ ଅଗ୍ନି କଣା…
ପ୍ରତୀକ୍ଷା…
– କୃଷ୍ଣା ମିଶ୍ର
Comments
କୃଷ୍ଣା ମିଶ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
