୧
ନିଶାର୍ଦ୍ଧରେ କଷ୍ଟଲାଗେ
କାନ୍ଥଘଣ୍ଟା ଟିକ୍ ଟିକ୍ ଶବ୍ଦ ।
ସତେଅବା, କୋଣାର୍କର ଚୂଡ଼ାଦେଶେ
ଯାଯାବର ବଢ଼େଇର
ନିଶାଣ ପ୍ରହାର
ଆଜି ପ୍ରମତ୍ତ ପ୍ରଲୁବ୍ଧ ॥
୨
ନିଶାର୍ଦ୍ଧରେ କଷ୍ଟଦିଏ
ମଶକର ଗୁଣୁଗୁଣୁ ଗୀତ ।
ସତେଅବା, ନକ୍ସଲର ପ୍ରାଦୁର୍ଭାବେ
ଉପଦ୍ରୁତ ପେଣ୍ଠସ୍ଥଳେ
ସଲାମ ସଂଗୀତ
ଆଜି ଉନ୍ମତ୍ତ, ଉନ୍ମୁକ୍ତ ॥
୩
ନିଶାର୍ଦ୍ଧର ପ୍ରାଣପିଡ଼ା
ନାଶୀତିତୋଷ୍ଣ ତୋ’ ଶରୀର ।
ସତେଅବା, ଜଙ୍ଗଲରେ ପର୍ଣ୍ଣମୋଚୀ
ପତ୍ରଝଡ଼ା ପ୍ରତିକ୍ଷାରେ
ଭୟଭୀତ ସୁପ୍ତ
ଋଗ୍ଣ ନିସ୍ତବ୍ଧ ନିଷ୍ଠୁର ॥
୪
ନିଶାର୍ଦ୍ଧରେ ସ୍ୱପ୍ନଭଙ୍ଗ
ଶୁଣି ପୂରାତନ ପ୍ରିୟାସ୍ୱର ।
ସତେଅବା, ଗାଆଁମୁଣ୍ଡ ମଶାଣୀରେ
ନିଶାଚର ଯକ୍ଷବର
ପ୍ରସାରି ତା’ ହସ୍ତ
ଡାକେ ପାଖେ ଆସ ମୋର ॥
୫
ନିଶାର୍ଦ୍ଧର ଅବଶୋଷ
ଅଭିଳାଷ, ଦୁର୍ଲଭ ଅପ୍ରାପ୍ତ ।
ସତେଅବା, ବାମନର ଅସାମର୍ଥ୍ୟ
ଚନ୍ଦ୍ରପୃଷ୍ଠ ଅପହଞ୍ଚ
ସୁଦୂର ସୁଦୀର୍ଘ
କଣ୍ଟକିତ ଜୀବପଥ ॥
୬
ନିଶାର୍ଦ୍ଧରେ ଦେହକଷ୍ଟ
ଅତି ପୂରାତନ କ୍ଷୟରୋଗ ।
ସତେଅବା, ଲବଣ-ସମୀର ଖାଏ
ଘୁଣପରି କାନ୍ଥସବୁ
ଗଡ଼ର ପ୍ରାଚୀର
ଆଜି ଭୋଗ୍ୟ ହୁଏ ଦୁର୍ଗ ॥
୭
ନିଶାର୍ଦ୍ଧରେ ଯମଦଣ୍ଡ
ପ୍ରେୟସୀର ରୂଢ଼ ତିରସ୍କାର ।
ସତେଅବା, କାରୁବାକୀ ମଗଧରେ
ଚଣ୍ଡାଶୋକ ନିବେଦନେ
ଅଶାନ୍ତ ଅସ୍ଥିର
କ୍ଷତପୂର୍ଣ୍ଣ ତିମିରବିକାର ॥
୮
ନିଶାର୍ଦ୍ଧରେ ଅପହୃତା
ଅପବିତ୍ରା ଅସହାୟା ଉଷା ।
ସତେଅବା, ଆତ୍ମା-ସ୍ୱତ୍ତ୍ୱ, ପରଭୁକ୍ତ
ଇଚ୍ଛା-ଦାବି ଭୃଲୁଣ୍ଠିତ
ଶସ୍ତାରେ ବିକ୍ରିତ
ହତଭାଗ୍ୟ ସତ୍ତା ପରିଭାଷା ॥
Comments
ଡ. ବିଶ୍ୱରଞ୍ଜନ କର ପେଶାରେ ଜଣେ ଡାକ୍ତର ହେଲେ ମଧ୍ୟ ନିଶା ତାଙ୍କର ଗପ ଓ କବିତା ଲେଖିବା । ସେ ତାଙ୍କର ଫାଙ୍କା ସମୟରେ ବିଭିନ୍ନ ଗପ ଓ କବିତା ଆଦି ଲେଖନ୍ତି । ଶୁଭପଲ୍ଲବର ପ୍ରତିଷ୍ଠା ହେବାଠାରୁ ସେ ସମ୍ପାଦକମାନଙ୍କୁ ବିଭିନ୍ନ ସମୟରେ ସାହାଯ୍ୟ କରିଆସିଛନ୍ତି ।
