ନାରୀ ପାଇଁ ରାଜା କିଏ
ପଚାରୁଛି ନାରୀ,
କେଉଁ ରାଜା ଶାସନରେ
ଅଛି ସେ ନିସ୍ତରି?
କୌରବ ରାଜ ସଭାରେ
ହୋଇଛି ଉଲଗ୍ନ,
ପାଣ୍ଡବ ହାରିଛି ତାକୁ
ହୋଇ ଜୁଆ ମଗ୍ନ ।
ରାବଣ ରାଜା ତାକୁ
ହରଣ କରିଛି,
ରାମକୁ ରାଜା କରି
ସେ ଅନଳେ ପଶିଛି ।
ଡାକୁକୁ ଭୟ କରି
ଧର୍ଷିତା ହୋଇଛି,
ସନ୍ଥକୁ ଭରସା କରି
ଜିଅନ୍ତା ଜଳିଛି ।
ମୁସଲମାନ ଭଲ କହି
ତଲାକ୍ ପାଇଛି,
ହିନ୍ଦୁର ସତୀ ଦାହରେ
ସତୀ ବୋଲାଇଛି ।
ବିଦେଶୀ ଶାସନେ ଘର
କୋଣେ ଲୁଚିଅଛି,
ଗଣତନ୍ତ୍ରରେ ଗଣ-
ଧର୍ଷିତା ହୋଇଛି ।
କେଉଁ ରାଜା ଭଲ ବୋଲି
ଜାଣି ନ ପାରିଛି,
ନାରୀ ଜନ୍ମ ପାଇଁ ନିଜ
ଭାଗ୍ୟକୁ ନିନ୍ଦିଛି ।
ପ୍ରତିକାର ପାଇଁ ଲୋଡ଼ା
ନାରୀ ଜାଗରଣ,
ଅସିଧାରୀ ହେବ କରି
ଲଜ୍ଜାକୁ ବାରଣ ।
Comments
କୁନା କୁମାର ଦାଶ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
