କିଛି ପରିସ୍ଥିତି, କିଛି ପରିବେଶ,
କିଛି ପ୍ରେମ, କିଛ ପ୍ରତାରଣାକୁ ପାଥେୟ କରି
କିଛି ପାଦ ଚିହ୍ନର ପଛେ ପଛେ ପାଦ ଥାପି
କିଛି ପରିଶ୍ରମର ପାଉଣାକୁ ହାତରେ ଭରି
କିଛି ନ ପାଇ ଅନେକ କିଛି ପାଇବାର ପ୍ରତିଶ୍ରୃତି ଦେଇ
ନିଜର ପ୍ରତିଛବିକୁ ନିଜ ମନେ ପ୍ରତିଷ୍ଠା କରି
ନିଜକୁ ପ୍ରତି ମୁହୂର୍ତ୍ତରେ ଜିତିବାର ନାମ ଜୀବନ ।
କିଛି କୋହକୁ ଛାତିରେ ଧରି,
କିଛି ଅନୁଭବକୁ ଅଙ୍ଗେ ଲିଭାଇ,
କିଛି ଅସମ୍ଭବକୁ ସମ୍ଭବ କରିବାର ଇପ୍ସାକୁ
ନିଜ ଭିତରେ ସଂଗଠିତ କରି
କିଛି ବାଟ ଚାଲି, ଝୁଣ୍ଟି,
ପୁଣି ଉଠି ଚାଲିବାର ନାମ ଜୀବନ ।
ହଜିଯାଇଥିବା ସ୍ମୃତିକୁ ସ୍ମୃତିରେ ରଖି
ଆଗକୁ ବଢ଼ିବାର ଇଚ୍ଛାକୁ ଉଜ୍ଜିବୀତ କରି
କିଛି ସ୍ୱପ୍ନକୁ ଖାଲି ସ୍ୱପ୍ନରେ ନ ରଖି
କିଛି ଅବାସ୍ତବତାରୁ ବାହାରି
ବାସ୍ତବତାର ରୂପ ଦେବାପାଇଁ କିଛି ଭରସା ରଖି
ନିରାଶା ମୁହଁରେ ଦୁଃଖକୁ ଦୂରେଇବା ପାଇଁ
ଶୁଖିଲା ଓଠ ଧାରେ ହସକୁ ସଜେଇ
ହସି ହସି ଜୀଇଁବାର ନାମ ଜୀବନ ।
– ସ୍ୱାତୀ ବନ୍ଦନା କର
Comments
ସ୍ୱାତୀ ବନ୍ଦନା କର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗଳ୍ପ ଓ କବିତା ଆଦି ରଚନା କରିଥାନ୍ତି ।
