ଓଠରେ ଖଇରୀ ମାଥେ କଳାବିନ୍ଦି କାନରେ ତୋର ଝୁମୁକା
ବାର ବାର ମୋର ନଜର କିଣଇ କାନରେ ତୋର ଝୁମୁକା ॥
ତୋ କଳା କେଶର ଛାଇ ତଳେ ରହି ଶୋଇବାକୁ ମୋର ମନ
ହେଲେ ତୋ କେଶରେ ଛନ୍ଦିରହି ଦୋଳି ଖେଳୁଛି କାନେ ଝୁମୁକା ॥
ଦେବୀ ଉପାସନା ପାଇଁ ମନ୍ଦିରକୁ ଯିବାର ହୁଏନା ପ୍ରାୟ
ହେଲେ ଦେବୀ ତୁହି ଘଣ୍ଟି ସମ ଝୁଲେ କାନରେ ତୋର ଝୁମୁକା ॥
ସିଧା ଆଖି ମୋର ମିଶେନା ତୋ ସହ ଦେଖେ ତୋତେ ଏ ଦୁନିଆଁ
ଅସୀମ ସାହସେ ବତାଶେ ଦୋଳି ତୋ ବେକ ଚୁମଇ ଝୁମୁକା ॥
ପାଉଁଜିର ସ୍ଵନ ଅଚିରେ ପାରଇ କରି ଦୂରୁ ସମ୍ମୋହନ
ହେଲେ ମୋର ଏଇ ଉଷ୍ଣ ନିଃଶ୍ବାସକୁ ବଶ କରେ ତୋ ଝୁମୁକା ॥
ବଜାରେ ବିକଇ ଭିନ୍ନ ରଙ୍ଗୀ ଭିନ୍ନ ସ୍ତରେ ଆକାରେ ପ୍ରକାରେ
ହେଲେ ତୋ କାନର ଶୋଭା ଯେ ବଢ଼ାଏ ଦାମିକା ସେଇ ଝୁମୁକା ॥
ବେଣୀ ବାନ୍ଧି ଫୁଲ ଖୋସି ଅଣ୍ଟା ଆଉ ଚାଲିର ଜବାବ ନାହିଁ
ହସ ଜିଣେ ମନ ଦେଖିଲେ ମୁହଁ ତୋ ପଛରୁ ଟାଣେ ଝୁମୁକା ॥
ଥାଉ କି ନଥାଉ ପାଦରେ ଅଳତା କଜଳ ନଖ ରଙ୍ଗୀନ
ଆଧୁନିକା ବାଦେ ଶାଢ଼ୀ ସାଲୁଆରେ ଥାଉ କାନରେ ଝୁମୁକା ॥
ନାରୀ ପାଇଁ ସଦା ରହିଛି ସମ୍ମାନ ଶକ୍ତିର ପ୍ରତୀକ ନାରୀ
କୋମଳ ହୃଦୟ ଶକ୍ତ ମନର ଯେ ପ୍ରତୀକ ତୋର ଝୁମୁକା ॥
ରହେ ବା ନରହେ ମୁଁ ତୋର ଜୀବନେ ସମୟେ ଭରସା ନାହିଁ
ହେଲେ ତୋ ଖୁସିର ପରିଚୟ ନେଇ କାନରେ ଥାଉ ଝୁମୁକା ॥
– ସୌମ୍ୟ ରଞ୍ଜନ ପାଲ
Comments
ସୌମ୍ୟରଞ୍ଜନ ପାଲ୍ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗଳ୍ପ, କବିତା, ପ୍ରବନ୍ଧ, ବ୍ୟଙ୍ଗ କଥା ଆଦି ରଚନା କରନ୍ତି । ସେ ବିଭିନ୍ନ ମଞ୍ଚରେ କବିତା ପରିବେଷଣ କରି ପୁରସ୍କୃତ ହେବା ସହ ଅନେକ ସମୟରେ କିଛି ଲୋକଙ୍କର ନକଲ ମଧ୍ୟ କରିଥାନ୍ତି ।
