ଚମ ଧୁଡ଼ୁ ଧୁଡ଼ୁ ପାଟିରେ ପାନ
ଆଖିରେ ଐନକ
ହାତରେ ଧରିଛି ବଙ୍କୁଲି ବାଡ଼ି
ମୋ ଜେଜେ ମା’କୁ ଦେଖ ।
ସକାଳେ ପାଣି ଚୋଉଁରା ମୂଳେ
ସଞ୍ଜରେ ଭାଗବତ
କଥାରେ କଥାରେ କହିବୁଲୁ ଥାଏ
ଜୟ ଜୟ ଜଗନ୍ନାଥ ।
ଶାଢ଼ୀ କାନିରେ ବାନ୍ଧି ରଖିଛି
ବିଧି ବିଧାନ ଯେତେ
ଢଗ ଢମାଳି ଶାସ୍ତ୍ର ପୁରାଣ
ଅଣ୍ଟିରେ ଖୋସିଛି କେତେ ।
ଗପ ପସରା ଖୋଲି ବସିଲେ
ପଡ଼େ ନିଅଣ୍ଟ ରାତି
ପିଲା ଛୁଆଙ୍କ ମେଳ ମଝିରେ
କହେ କାହାଣୀ ନିତି ।
କେତେ ପିଠାପଣା ଆମ୍ବୁଲ ଆଚାର
ଗଢ଼େ ସରାଗେ ବସି
ତା’ ହାତେ ପଖଳା ଉସୁନା ପଖାଳ
ଉଠେ ମହମହ ବାସି ।
କେବେ ସେ ସରଳ କେବେ ସେ କଠୋର
ସ୍ନେହ ନିରନ୍ତର ବାଣ୍ଟି
ତା’ ଚାଲିଚଳଣୀ ତା’ ବେଶଭୁଷାରେ
ଲାଗେ ଓଡ଼ିଆଣି ଖାଣ୍ଟି ।
– ବି. ଜେନା (ଲିପ୍ସି)
Comments
ବି. ଜେନା ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ରଚନା କରନ୍ତି । ସେ ସ୍ମୁଲ୍ ଆପ୍ରେ ଅନେକ ଓଡ଼ିଆ ଏବଂ ହିନ୍ଦୀ ଗୀତ ମଧ୍ୟ ଗାଇଛନ୍ତି ।
