ଶୈଳେନ୍ଦ୍ର ସାମନ୍ତରାୟ ଆଜିର ଯୁବପିଢ଼ିର ପାଖରେ ଏକ ଲୋକପ୍ରିୟ ନାମ । ନ’ ବର୍ଷ ବୟସରେ ପ୍ରଥମେ ସେ ଡ୍ୟାନ୍ସ ଇଣ୍ଡିଆ ଡ୍ୟାନ୍ସରେ ପ୍ରୋଗ୍ରାମରେ ପ୍ରତିଦ୍ୱନ୍ଦିତା କରିଥିଲେ । ବଡ଼ ହେଲା ପରେ ୱେବ ସିରିଜ “ସାହେବ ବିବି ଆଉ ସାଲା”ରେ ଅଭିନୟ କରି ସେ ଦର୍ଶକଙ୍କ ମନ ଜିଣିଥିଲେ । ଆଉ ଏବେ ତାଙ୍କ ଅଭିନୀତ ମ୍ୟୁଜିକ ଭିଡ଼ିଓ କଲେଜ ଡେ, ତୋ ଘର ବାଟ ଦେଇ ଆଉ ପୁଚୁଲି ଗାଲି ବର୍ତ୍ତମାନ ସମସ୍ତଙ୍କ ନାହିଁ ନଥିବା ପ୍ରଶଂସା ଗୋଟୋଉଚି । ଓଡ଼ିଆ କଥାଚିତ୍ରର ଆଗାମୀ ଉଦୟମାନ ତାରକା ହିସାବରେ ଗଣା ହେଉଥିବା ଶୈଳେନ୍ଦ୍ର ସାମନ୍ତରାୟଙ୍କର ଶୁଭପଲ୍ଲବ ତରଫରୁ ସାକ୍ଷାତକାର ନେଇଛନ୍ତି ଲେଖିକା ସୁଲଗ୍ନା ମହାନ୍ତି । ଶୁଭପଲ୍ଲବ ତରଫରୁ ଶୈଳେନ୍ଦ୍ରଙ୍କୁ ଆମେ ଏଇ ସାକ୍ଷାତକାରକୁ ସ୍ୱାଗତ କରୁଛୁ ।
ପ୍ରଶ୍ନ: ରିଆଲିଟି ଶୋରୁ ୱେବ ସିରିଜ ଆଉ ୱେବ ସିରିଜରୁ ଲୋକପ୍ରିୟ ମ୍ୟୁଜିକ ଭିଡ଼ିଓ । ଓଡ଼ିଆ ନୂଆପିଢ଼ିଙ୍କ ଆଦର୍ଶ ହିସାବରେ ଗଣା ହେଉଛନ୍ତି ଏବେ ଆପଣ । ଆପଣଙ୍କ ଏଇ ଯାତ୍ରା ବିଷୟରେ କ’ଣ କହିବେ?
ଉତ୍ତର: ଏ ପର୍ଯ୍ୟନ୍ତ ଯାହା ବି ଚାଲିଛି ମତେ ଏ ସବୁ ସ୍ୱପ୍ନ ଭଳି ଲାଗୁଚି । ଲାଗୁଚି ଯେମିତି ଏଇଟା ଗୋଟେ ରୋଲର କୋଷ୍ଟର ରାଇଡ଼ । କେବେ ବି ଭାବିନଥିଲି ମୋର ଏଇ ଛୋଟିଆ ଯାତ୍ରାଟି ଏତେ ସୁନ୍ଦର ରହିବ ବୋଲି ।
ପ୍ରଶ୍ନ: ଏଇ ଯାତ୍ରାରେ ଆପଣଙ୍କୁ କିଏ କିଏ ସମର୍ଥନ ଦେଇ ଆସିଛନ୍ତି?
ଉ: ମୋ ବାପା, ମା’ ଆଉ ମୋ ବଡ଼ ଭାଇ ମତେ ସବୁ କ୍ଷେତ୍ରରେ ସମର୍ଥନ ଦେଇ ଆସିଛନ୍ତି । ସେମାନେ ସବୁବେଳେ ଛାଇ ଭଳି ଭଳି ମୋ ସହ ଠିଆ ହେଇଛନ୍ତି । ମୋ ସାଙ୍ଗମାନେ ବି ମତେ ପ୍ରତି ପାଦରେ ସାହାଯ୍ୟ କରି ଆସିଛନ୍ତି ।
ପ୍ରଶ୍ନ: ଆଜି ପ୍ରତିଟି ଓଡ଼ିଆ ଘରେ ବାପାମା’ମାନେ ପୁଅ ଡାକ୍ତର କି ଇଞ୍ଜିନିଅରଟିଏ ହଉ ବୋଲି ଚାହାନ୍ତି । ଏମିତି ଏକ ସମୟରେ ମନୋରଞ୍ଜନ କ୍ଷେତ୍ରରେ କାମ କରିବେ ବୋଲି ଆପଣ ନିଜ ବାପାମା’ଙ୍କୁ କେମିତି ରାଜି କରେଇଥିଲେ?
ଉ: ସତ କହିବାକୁ ଗଲେ ମତେ କେବେ ମୋ ପରିବାର ଲୋକଙ୍କୁ ବୁଝେଇବାକୁ ପଡ଼ିନାହିଁ । ମୋ ପରିବାର ନିଜ ଇଚ୍ଛାକୁ କେବେ ମୋ ଉପରେ ଲଦିଦେଇ ନାହାନ୍ତି । ସବୁବେଳେ ମୋର ନୃତ୍ୟ ଓ ଅଭିନୟ କରିବାର ସିଦ୍ଧାନ୍ତକୁ ସମର୍ଥନ ଦେଇଛନ୍ତି ସେମାନେ । ଆଉ ମୁଁ କରୁଥିବା ପ୍ରତିଟି କାମରେ ସେମାନେ ଭରସା ରଖି ଆସିଛନ୍ତି ।
ପ୍ରଶ୍ନ: ଆଜିର ଶିକ୍ଷିତ ଯୁବପିଢ଼ି ଓଡ଼ିଆ ଦେଖିବାକୁ, ଶୁଣିବାକୁ କି ପଢ଼ିବାକୁ ଭଲ ପାଉନାହାନ୍ତି । ହେଲେ ଆପଣଙ୍କ ମ୍ୟୁଜିକ ଭିଡ଼ିଓଗୁଡ଼ିକ ତାଙ୍କୁ ପୁଣି ଓଡ଼ିଆ ସଂଗୀତମୁହାଁ କରିଛି । ଏହା ଉପରେ ଆପଣ କ’ଣ କହିବେ?
ଉ: ଲୋକଙ୍କ ମୋ ପ୍ରତି ଏତେ ଭଲ ପାଇବା ଦେଖି ମୁଁ ସତରେ ଅଭିଭୂତ । ମୁଁ କେବେ ଭାବିନଥିଲି ଲୋକଙ୍କ ଉପରେ ଏଇ ଗୀତଗୁଡ଼ିକର ଏତେ ମାତ୍ରାରେ ପ୍ରଭାବ ପଡ଼ିବ । ଆଉ ଯଦି ମୋ କାମ ଦ୍ୱାରା ଓଡ଼ିଆ ଭାଷା ପାଇଁ ମୁଁ ଟିକିଏ ବି ସାହାଯ୍ୟ କରିପାରିଛି ତା’ହେଲେ ସେଇଥିପାଇଁ ମୁଁ ବହୁତ ଖୁସି ।
ପ୍ରଶ୍ନ: ସୋସିଆଲ ମିଡ଼ିଆରେ ଆପଣ ଏବେ ବହୁତ ଲୋକପ୍ରିୟ । ଟିକ୍ଟକ୍ରେ ଆପଣଙ୍କ ଗୀତ ଉପରେ ଓଡ଼ିଆ ଯୁବପିଢ଼ି ସବୁଠୁ ଅଧିକ ଭିଡ଼ିଓ କରୁଛନ୍ତି । ଏଇ ଲୋକପ୍ରିୟତାକୁ ଆପଣଙ୍କର ପ୍ରତିକ୍ରିୟା କ’ଣ?
ଉ: ସୋସିଆଲ ମିଡ଼ିଆରେ ମୁଁ କେତେ ଲୋକପ୍ରିୟ ମୁଁ ସେଇଟା ତ ମୁଁ କହି ପାରିବିନି । ହେଲେ ଏଇଟା ସତ ଯେ ସବୁଦିନ ମୁଁ ଦର୍ଶକମାନଙ୍କ ପାଖରୁ ଅନେକ ମେସେଜ ପାଉଛି । ଆଉ ମୁଁ ଚେଷ୍ଟା କରୁଛି ଯେ ଯେତେ ଦୂର ସମ୍ଭବ ଦର୍ଶକମାନଙ୍କ ପାଖରୁ ଆସୁଥିବା ପ୍ରତିଟି ମେସେଜର ଉତ୍ତର ଦେବି । କୌଣସି ମେସେଜ ଯେମିତି ଅଣଦେଖା ନ ହୁଏ ।
ପ୍ରଶ୍ନ: ଆଜି ପର୍ଯ୍ୟନ୍ତ ପାଇଥିବା ସବୁଠୁ ମିଠା ପ୍ରଶଂସା କ’ଣ?
ଉ: ଯେତେବେଳେ ଲୋକେ ମତେ କୁହନ୍ତି ଯେ ତୁମକୁ ଓଡ଼ିଆ ଫିଲ୍ମ ଇଣ୍ଡଷ୍ଟ୍ରିରେ କାମ କରିବା ପାଇଁ ନିହାତି ସୁଯୋଗ ମିଳିବା ଦରକାର ସେତେବେଳେ ମତେ ସତରେ ବହୁତ ଖୁସି ଲାଗେ ।
ପ୍ରଶ୍ନ: ଆପଣ ଏବେ କେଉଁଠି ପାଠ ପଢ଼ୁଛନ୍ତି? ଆପଣଙ୍କ ପାଇଁ ଶିକ୍ଷାର ମହତ୍ତ୍ୱ କେତେ?
ଉ: ମୁଁ ଏବେ ମଧୁସୂଦନ ଲ କଲେଜରେ ମୋର ପାଞ୍ଚ ବର୍ଷିଆ ଇଣ୍ଟିଗ୍ରେଟେଡ଼ ଲ (law) ପାଠ ଜାରି ରଖିଛି । ମୋ ଜୀବନରେ ଶିକ୍ଷାର ସ୍ଥାନ ଅତ୍ୟନ୍ତ ମହତ୍ତ୍ୱପୂର୍ଣ୍ଣ । ମୁଁ ଭାବେ ଶିକ୍ଷାର ସାହାଯ୍ୟ ନେଇ ଜଣେ ମଣିଷ ନିଜ ଜୀବନରେ ଯେଉଁଠି ଚାହିଁବ ସେଇଠି ପହଞ୍ଚି ପାରିବ । ମୋ ଘରେ ମୋ ପରିବାରବର୍ଗ ମଧ୍ୟ ଶିକ୍ଷାକୁ ସବୁବେଳେ ପ୍ରାଥମିକତା ଦେଇଆସିଛନ୍ତି ।
ପ୍ରଶ୍ନ: ଆପଣ ବହି ପଢ଼ିବାକୁ ଭଲ ପାଆନ୍ତି? ଆପଣ ପଢ଼ିଥିବା କେଉଁ ବହି ଆପଣଙ୍କୁ ପ୍ରଭାବିତ କରିଛି?
ଉ: ହଁ । ମତେ ପଢ଼ିବାକୁ ଭଲ ଲାଗେ । ପଢ଼ିଥିବା ବହି ଭିତରେ ‘ଦ ସେକ୍ରେଟ’ (The Secret) ବହି ମୋର ସବୁଠାରୁ ପ୍ରିୟ । ଏଇ ବହି ମତେ ମୋ ବେଷ୍ଟ ଫ୍ରେଣ୍ଡ ପଢ଼ିବାପାଇଁ କହିଥିଲା ଆଉ ମୁଁ ଭାବୁଛି ମୋ ଜୀବନ ପରିବର୍ତ୍ତନ କରିବାରେ ଏଇ ବହିର ଅବଦାନ ଅନେକ ବେଶୀ ।
ପ୍ରଶ୍ନ: କେଉଁ ଅଭିନେତା ଅଭିନେତ୍ରୀଙ୍କୁ ଆପଣ ପସନ୍ଦ କରନ୍ତି?
ଉ: ହିନ୍ଦୀ ସିନେମା ଅଭିନେତା ଶାହରୁଖ ଖାନଙ୍କର ମୁଁ ଜଣେ ଉପାସକ କହିଲେ ଭୁଲ ହବନି । ନିଜ କାମ ପ୍ରତି ତାଙ୍କର ନିଷ୍ଠା ଓ ଆନ୍ତରିକତା ଦେଖି ମୁଁ ବହୁତ ଅନୁପ୍ରାଣିତ । ଅଭିନେତ୍ରୀ ମାନଙ୍କ ଭିତରେ ଦକ୍ଷିଣ ଭାରତୀୟ ନାୟିକା ତଥା ନୃତ୍ୟଶିଳ୍ପୀ ସାଇ ପଲ୍ଲବୀଙ୍କ ଅସାଧାରଣ ତଥା ବହୁମୁଖୀ ପ୍ରତିଭାର ମୁଁ ଜଣେ ବହୁତ ବଡ଼ ପ୍ରସଂଶକ ।
ପ୍ରଶ୍ନ: ନିଜ ଜୀବନରେ ଘଟିଥିବା କିଛି ମଜାଳିଆ ଘଟଣା ଆମର ପାଠକ ପାଠିକାଙ୍କ ସାଙ୍ଗରେ ବାଣ୍ଟିବେ କି?
ଉ: ଥରେ ଗୋଟିଏ ସମାରୋହରେ ମୋର ନୃତ୍ୟ ପରିବେଷଣ କରିବାର ଥିଲା । ସେଇଥିପାଇଁ ମତେ ଗୋଟିଏ ନିର୍ଦ୍ଧିଷ୍ଟ ଗୀତରେ ଅଭ୍ୟାସ କରିବାକୁ କୁହାଯାଇଥିଲା । ମୁଁ ସେଇ ଗୀତରେ ଅଭ୍ୟାସ ବି କରିଥିଲି । କିନ୍ତୁ ସମାରୋହ ଦିନ ମୁଁ ନାଚିଲା ବେଳେ ସେମାନେ ଗୋଟେ ପୁରାପୁରି ଅଲଗା ଗୀତ ଲଗେଇଲେ ଆଉ ମତେ ସେଇଠି ସେମିତି ସେଇ ନୂଆ ଗୀତରେ ନାଚିବାକୁ ପଡ଼ିଲା । ପରେ ଜଣା ପଡ଼ିଲା ଯେ ମୁଁ ଅଭ୍ୟାସ କରିବା ପାଇଁ ସେମାନେ ମତେ ଯେତେବେଳେ ଗୀତଟିର ନାଁ କହିଥିଲେ ମୁଁ ସେଇ ନାଁଟା ସେତେବେଳେ ଭୁଲ ଶୁଣିଥିଲି । ଆଜି ବି ସେଇ କଥା ମନେ ପଡ଼ିଲେ ମତେ ବହୁତ ହସଲାଗେ ।
ପ୍ରଶ୍ନ: ଆପଣଙ୍କ ରୋମାଣ୍ଟିକ ଚକଲେଟ ହିରୋ ଅବତାରକୁ ଲୋକେ ବହୁତ ଭଲ ପାଉଛନ୍ତି । ତେବେ ବାସ୍ତବ ଜୀବନରେ ଆପଣ କେବେ ପ୍ରେମରେ ପଡ଼ିଛନ୍ତି?
ଉ: ହଁ । ମୁଁ ନିହାତି ପ୍ରେମରେ ଭାବରେ ପଡ଼ିଛି । ସେଇ ପ୍ରେମର ପ୍ରତିଫଳନ ମୋର ଚକଲେଟ ନାୟକର ଅଭିନୟରେ ବି ଫୁଟିଉଠେ ବୋଲି ମୁଁ ଭାବେ ।
ପ୍ରଶ୍ନ: ଜଣେ ଯୁବ କଳାକାର ହିସାବରେ ଆଜିର ଓଡ଼ିଆ ସିନେମାର ସ୍ଥିତି ବିଷୟରେ ଆପଣ କ’ଣ କହିବେ?
ଉ: ମୁଁ ବହୁତ ଖୁସି ଯେ ଆପଣ ଏଇ ପ୍ରଶ୍ନଟି ପଚାରିଲେ । ମୁଁ ଭାବୁଛି ଆଜିକା ସମୟରେ ଏଇ ବିଷୟଟି ଉପରେ ଆମେ ନିହାତି କଥା ହେବା ଜରୁରୀ । ସବୁଠୁ ବଡ଼ ପ୍ରଶ୍ନ ହେଉଛି ଆଜି ଆମର ଯୁବପିଢ଼ୀ କାହିଁକି ଓଡ଼ିଆ ସିନେମା ଦେଖିବାକୁ ଇଛା କରୁନାହାନ୍ତି ଯେତେବେଳେ କି ସେମାନେ ହିନ୍ଦୀ, ଇଂଲିଶ ଆଉ ଅନ୍ୟ ଭାଷାର ସିନେମାକୁ ଖୁସିରେ ଉପଭୋଗ କରୁଛନ୍ତି । ଆଞ୍ଚଳିକ ସିନେମା ଆଉ ବିଶେଷ କରି ଦକ୍ଷିଣ ଭାରତର ସିନେମାକୁ ଦେଖିଲେ ଜାଣିପାରିବେ ଯେ ସେଠିକାର ଯୁବପିଢ଼ୀ ତାଙ୍କର ଭାଷାର ସିନେମାପାଇଁ ପାଗଳ । ସେମାନେ ଏଥିପାଇଁ ପାଗଳ କାରଣ ତାଙ୍କ ସିନେମାରେ ସୃଜନଶୀଳତା ବା କ୍ରିଏଟିଭିଟି ଅଛି । ସେମାନେ କପି ପେଷ୍ଟରେ ବିଶ୍ୱାସ କରନ୍ତି ନାହିଁ । ଏମିତି କହିବାକୁ ଗଲେ ସିନେମାର ଉନ୍ନତି ପାଇଁ ଯୁବପିଢ଼ୀ ତାକୁ ଭଲ ପାଇବା ଅତ୍ୟନ୍ତ ଜରୁରୀ । ଆମ ଓଡ଼ିଆ ଇଣ୍ଡଷ୍ଟ୍ରି ଯଦି ଯୁବ ଦର୍ଶକଙ୍କ ମନଲାଖି ଫିଲ୍ମ ତିଆରି କରିବେ ତା’ହେଲେ ଆମ ସିନେମା ନିଶ୍ଚିତ ଆଗକୁ ଯିବ । ଆଉ ସେଇଥିପାଇଁ ନୂଆ ଆଉ ମୌଳିକ କାହାଣୀ ଦରକାର । ଅନ୍ୟର ନକଲ କରିକି ସିନେମା କରିବା ଦିନ ଚାଲିଯାଇଛି । ଏବେ ସମସ୍ତଙ୍କ ହାତରେ ସ୍ମାର୍ଟ ଅଛି ଆଉ ଇଣ୍ଟରନେଟ । ସମସ୍ତେ ଜାଣି ପାରୁଛନ୍ତି କେଉଁ କାହାଣୀ ନୂଆ ଆଉ କେଉଁଟା ନକଲ । ଆମର ଯେତିକି ପ୍ରଯୋଜକ ଆଉ ନିର୍ଦ୍ଦେଶକ ଅଛନ୍ତି ସେମାନଙ୍କୁ ଏଣିକି ଆଜିର ଯୁବଦର୍ଶକଙ୍କ ମନ ଜିଣିବାକୁ ପଡ଼ିବ । ଯଦି ଯୁବ ଦର୍ଶକ ଆପଣଙ୍କ କାମକୁ ପସନ୍ଦ କଲେ ତା’ହେଲେ ସେଇ ସିନେମାଟି ନିଶ୍ଚିତ ଭାବେ ଲୋକପ୍ରିୟ ହେବ ସେଥିରେ ସନ୍ଦେହ ନାହିଁ । ଆମର ଓଡ଼ିଆ ଇଣ୍ଡଷ୍ଟ୍ରି ଅନ୍ୟ କେଉଁ ଇଣ୍ଡଷ୍ଟ୍ରିଠାରୁ କୌଣସି ଗୁଣରେ କମ୍ ନୁହେଁ । କିନ୍ତୁ ଏହାକୁ ଆଉରି ଆଗକୁ ଦରକାର ଆଉରି ସୃଜନଶୀଳ ଆଉ ରଚନାତ୍ମକ କାମ ।
ପ୍ରଶ୍ନ: ମନୋରଞ୍ଜନ ଦୁନିଆର କେଉଁ ବିଶେଷତ୍ୱ ଆପଣଙ୍କୁ ଏଇ କ୍ଷେତ୍ରକୁ ଟାଣି ଆଣିଛି?
ଉ: ମନୋରଞ୍ଜନ କ୍ଷେତ୍ରର ସବୁକିଛି ମତେ ଆକର୍ଷିତ କରେ । ଶୁଟିଂ ସେଟରେ ଆକ୍ସନ କଲ୍ ହବାଠାରୁ ପ୍ୟାକ ଅପ ହେବା ଯାଏଁ ସବୁକିଛି ମତେ ଭଲ ଲାଗେ । ଆଉ ସେଇଥିପାଇଁ ବୋଧେ ମୁଁ ଜଣେ ଅଭିନୟ ହବାକୁ ମନସ୍ଥିର କରିଛି ।
ପ୍ରଶ୍ନ: ଆପଣ କେଉଁଭଳି ପ୍ରୋଗ୍ରାମ ଦେଖିବାକୁ ଭଲପାଆନ୍ତି?
ଉ: ମତେ ଆମେରିକାନ ଡ୍ରାମା ଆଉ ସିଟକମ୍ ଦେଖିବାକୁ ବହୁତ ଭଲ ଲାଗେ ।
ପ୍ରଶ୍ନ: ଭବିଷ୍ୟତରେ କିଭଳି ପରିଯୋଜନାରେ କାମ କରିବାକୁ ଆଶା ରଖିଛନ୍ତି?
ଉ: ମୁଁ ଏବେ ଇଣ୍ଡଷ୍ଟ୍ରିରେ ନୂଆ । ତେବେ ନିଜ ପାଇଁ ନିଶ୍ଚିତ ଭାବେ ମୁଁ କିଛି ଭଲ ସୁଯୋଗ ଖୋଜୁଛି । ଲୋକଙ୍କଠୁ ଶୁଣେ ଯେ ମୁଁ ଚକଲେଟ ବୟ ଭଳି ଦେଖାଯାଏ । ତେଣୁ ମୁଁ ସେଇଭଳି କିଛି ଭଲ କାହାଣୀ ଥିବା ରୋମାଣ୍ଟିକ ପ୍ରୋଜେକ୍ଟରେ କାମ କରିବାକୁ ଚାହିଁବି । ଆହୁରି ବି ଆଗକୁ ଜଣେ ଅଭିନେତା ହିସାବରେ ନୂଆ କିଛି କରିବାର ଆଉ ମୁଁ ନିଜେ ନିଜକୁ ଚ୍ୟାଲେଞ୍ଜ କରିପାରୁଥିବା ଭଳି ପ୍ରୋଜେକ୍ଟରେ କାମ କରିବାର ଆଶା ରଖିଛି । ଯଦି ସ୍ୱପ୍ନ କଥା ପଚାରନ୍ତି ତା’ହେଲେ ଗୋଟିଏ ଦିନ ଫ୍ରେଣ୍ଡସ, ବ୍ରେକିଙ୍ଗ ବ୍ୟାଡ଼, ବେଟର କଲ୍ ସୋଲ, ଆଉ ଗେମ ଅଫ ଥ୍ରୋନ୍ସ ଭଳି ଡ୍ରାମାରେ କାମ କରିବା ମୋର ସ୍ୱପ୍ନ ।
ପ୍ରଶ୍ନ: ଜଣେ ସିନେମା ଅଭିନେତା ହବା ପାଇଁ ଆପଣ ନିଜକୁ କିଭଳି ଭାବେ ପ୍ରସ୍ତୁତ କରୁଛନ୍ତି?
ଉ: ସେମିତି କିଛି ତଥାକଥିତ ରୁଟିନ ତ ମୁଁ ଏବେ ଅନୁସରଣ କରୁନାହିଁ । ତେବେ ଜଣେ ଅଭିନେତା ହିସାବରେ ପ୍ରତିଦିନ ମୋର ପ୍ରତିଟି ଶୁଟିଂସେଟରେ ମୁଁ ନୂଆ ନୂଆ ଅଭିଜ୍ଞତା ହାସଲ କରୁଛି ବୋଲି ଭାବୁଛି ।
ପ୍ରଶ୍ନ: ଖାଲି ସମୟରେ ଆପଣ କ’ଣ କରନ୍ତି?
ଉ: ଖାଲି ସମୟେ ମୁଁ ମୋ ବେଷ୍ଟଫ୍ରେଣ୍ଡ ତଥା ଅନ୍ୟାନ୍ୟ ସାଙ୍ଗଙ୍କ ସହ ଖାଇବାକୁ ଆଉ ବୁଲିବାକୁ ଭଲ ପାଏ । ଫୁଟବଲ ଖେଳିବାକୁ ବି ମତେ ବହୁତ ଭଲଲାଗେ । କେବେ କେବେ ମୁଁ ଏକା ଏକା ପ୍ରକୃତିର ସୁନ୍ଦରତାକୁ ବି ଉପଭୋଗ କରେ ।
ପ୍ରଶ୍ନ: ଆଗାମୀ ଦିନରେ କେଉଁସବୁ ପ୍ରକଳ୍ପରେ ଦର୍ଶକମାନେ ଆପଣଙ୍କ ଦେଖିପାରିବେ?
ଉ: ମୁଁ ଏବେ କିଛିଟା ନୂଆ ପ୍ରୋଜେକ୍ଟରେ କାମ କରୁଛି । ଗୋଟିଏ ଫିଚର ଫିଲ୍ମ ପାଇଁ ବି କଥାବାର୍ତ୍ତା ଚାଲିଛି । ତେବେ ବହୁତ ଶୀଘ୍ର ଦର୍ଶକମାନେ ମତେ ଆଉ କିଛି ମ୍ୟୁଜିକ ଭିଡ଼ିଓରେ ନିଶ୍ଚିତ ଦେଖିବାକୁ ପାଇବେ ।
ପ୍ରଶ୍ନ: ଏବେ ମୋର ଶେଷ ପ୍ରଶ୍ନ । ଆପଣକୁ ଅନୁସରଣ କରୁଥିବା ଆଜିର ଯୁବପିଢ଼ିଙ୍କ ପାଇଁ ଆପଣଙ୍କ ବାର୍ତ୍ତା କ’ଣ?
ଉ: ପ୍ରଥମେ ତ ମୁଁ ସମସ୍ତଙ୍କୁ ନିଜର ଶିକ୍ଷା ଉପରେ ଗୁରୁତ୍ୱ ଦେବାପାଇଁ ପରାମର୍ଶ ଦେବି । ଦ୍ୱିତୀୟରେ କହିବି ପାଠପଢ଼ା ଉପରେ ମନୋନିବେଶ କରିବା ସାଙ୍ଗେ ସାଙ୍ଗେ ନିଜ ସ୍ୱପ୍ନକୁ ସାକାର କରିବା ପାଇଁ ଗଭୀର ଆତ୍ମବଳ ଓ ଦୃଢ଼ ନିଶ୍ଚୟ ମଧ୍ୟ ନିଜ ମନରେ ରହିବା ନିହାରୀ ଜରୁରୀ । ଏ ସବୁ ଗୁଣ ଏକାଠି ହେଲେ ସଠିକ ସମୟରେ ସଠିକ ସୁଯୋଗ ନିଶ୍ଚିତ ଭାବରେ ମିଳିବ ବୋଲି ମୋର ବିଶ୍ୱାସ ।
ଏଇ ସାକ୍ଷାତକାର ପାଇଁ ନିଜର ସମୟ ଦେଇ ଥିବାରୁ ଟିମ୍ ଶୁଭପଲ୍ଲବ ତରଫରୁ ଶୈଳେନ୍ଦ୍ରଙ୍କୁ ବହୁତ ବହୁତ ଧନ୍ୟବାଦ ।
Comments
ଡ. ସୁଲଗ୍ନା ମହାନ୍ତି
ଡ. ସୁଲଗ୍ନା ମହାନ୍ତି, ପେଶାରେ ଜଣେ ଇଂରାଜୀ ଅଧ୍ୟାପିକା । ମାତ୍ର ଓଡ଼ିଆ ଗଳ୍ପ ରଚନାରେ ସେ ବେଶ୍ ପରିଚିତା । ତାଙ୍କର ପ୍ରଥମ ଗଳ୍ପ ସଂକଳନ ନାଲି ଚୁଡ଼ାର ଅଭୁତପୂର୍ବ ସଫଳତା ପରେ ପ୍ରଥମ ଉପନ୍ୟାସ ଆନିର ରୋଷେଇ ଘର ପ୍ରକାଶ ପାଇଥିଲା ।
