ଏହି ଲକ୍ଡାଉନ୍ ସମୟରେ ଓଡ଼ିଆ କମେଡ଼ି ଜଗତରେ ଏକ ନୂଆ ନାଁ ଯୋଡ଼ିହୋଇଗଲା, ଗିରିଜା ପଣ୍ଡା । ଯଦିଓ ପୂର୍ବରୁ ସେ ଅନେକ ଥିଏଟର୍, ଦୂରଦର୍ଶନ କାର୍ଯ୍ୟକ୍ରମ ଆଦିରେ କାମ କରିଛନ୍ତି କିନ୍ତୁ କାକା ଚରିତ୍ରରେ ତାଙ୍କର ହାସ୍ୟରସ ଭରା ଅଭିନୟ ଇଣ୍ଟରନେଟ ଦୁନିଆରେ ତାଙ୍କୁ ଲୋକପ୍ରିୟ କରାଇଛି । ତେବେ ଚାଲନ୍ତୁ ତାଙ୍କ ସହ କଥା ହେବା, ଜାଣିବା ତାଙ୍କ ବିଷୟରେ କିଛି ଅଜଣା କଥା ।
ପ୍ରଶ୍ନ ୧. ଆପଣ ଏହି କାକା ଚରିତ୍ରକୁ କାହିଁକି ବାଛିଲେ?
ଉତ୍ତର: ଛୋଟବେଳୁ ମୋତେ ମିମିକ୍ରି କରିବାକୁ ଭଲ ଲାଗେ ଆଉ ଏହି ଲକ୍ଡାଉନ୍ ସମୟରେ ମୁଁ ଘରେ ଏମିତି ଭିଡିଓ କରୁଥିଲି । ଏହି ଲକ୍ଡାଉନ୍ ସମୟରେ ଥରେ ମାର୍କେଟ୍ରେ ମୋତେ ପୋଲିସ୍ ବାଡ଼େଇଲା ଆଉ ଫେରିଲାବେଳେ ତାକୁ ନେଇକି କିଛି କରିବାକୁ ମୁଁ ମନସ୍ଥ କଲି । ମିହିରି ଦାସ ମୋତେ ବହୁତ ଭଲ ଲାଗନ୍ତି ଆଉ ମୁଁ ବି ଆଗରୁ ତାଙ୍କର ଅନେକ ମିମିକ୍ରି କରିଛି । ସଂଯୋଗ ବଶତଃ ସେଦିନ ଅଭିମନ୍ୟୁ ଫିଲ୍ମ ବି ଦେଉଥିଲା, ସେଇଥିରୁ ମୁଁ କାକାଙ୍କ ଚରିତ୍ର ଆଉ ସେ ଘଟଣାକୁ ନେଇ ଭିଡିଓ ତିଆରି କଲି । ଆଉ ଏହି ଚରିତ୍ରକୁ ନେଇ ଭିନ୍ନ ଭିନ୍ନ ପାର୍ଟରେ କେମିତି ଦର୍ଶକଙ୍କୁ ଆକର୍ଷିତ କରିହେବ ସେ ବିଷୟରେ କାମ କରିବା ଆରମ୍ଭ କଲି ।
ପ୍ରଶ୍ନ ୨. କେବେ ଅରିଜିନାଲ୍ କାକା ମାନେ ମିହିର ଦାସଙ୍କ ସହ ଏହି ରୂପରେ ଭେଟିଲେ କ’ଣ ରହିବ ଆପଣଙ୍କର ପ୍ରତିକ୍ରିୟା?
ଉତ୍ତର: ଯେତେବେଳେ ମୁଁ ଜିତୁ ସାର୍ଙ୍କର ଗୋଟିଏ ଫିଲ୍ମରେ ମୁଁ ଚମ୍ପା ନାମକ ଏକ କିନ୍ନରର ଚରିତ୍ର କରୁଥିଲି । ଏହି ଫିଲ୍ମରେ ପପୁ ପମ୍ ପମ୍ଙ୍କ ସମେତ କୁନା ତ୍ରିପାଠୀ ଓ ମିହିର ଦାସ ବି କାମ କରୁଥିଲେ । ସେଇଠି ମୋତେ ସେ ଜାଣିଥିଲେ ଆଉ ଏବେ ବି ସେ ଜାଣିଛନ୍ତି, ସେଦିନ ଚମ୍ପା ଚରିତ୍ରରେ ଅଭିନୟ କରୁଥିବା ପିଲାଟି ଏବେ କାକା ଭାବରେ ଦର୍ଶକଙ୍କୁ ହସାଉଛି ।
ପ୍ରଶ୍ନ ୩. ଟିଭିରେ କାମ କରିବାର ପ୍ରଥମ ସୁଯୋଗ କେମିତି ପାଇଥିଲେ, ଆଉ ସେ ପ୍ରଥମଦିନର ଅନୁଭୂତି କ’ଣ ଥିଲା?
ଉତ୍ତର: ମୁଁ ଆଗରୁ ଭୁନେଶ୍ୱରରେ ଥିଏଟରରେ ଅଭିନୟ କରୁଥିଲି ଆଉ ୨୦୧୬ ମସିହାରେ ଯେତେବେଳେ ମୁଁ ଭୁବନେଶ୍ୱରେ ପଢ଼ୁଥିଲି, ସେତେବେଲେ ଡିଡି ଓଡ଼ିଆର ଏକ କାର୍ଯ୍ୟକ୍ରମରେ ପାର୍ଶ୍ୱ ଚରିତ୍ରରେ ଅଭିନୟ କରିଥିଲି । ତା’ପରେ ଜୀ ସାର୍ଥକର “କମେଡ଼ି ଟକ୍କର” ରିଆଲିଟି ଶୋ’ରେ ମୁଁ ଟପ୍-୧୦ରେ ଥିଲି । ପ୍ରମେୟ ନ୍ୟୁଜ୍ ୭ରେ ପ୍ରସାରିତ ରିଆଲିଟି ଶୋ’ “ବ୍ୟଙ୍ଗ ଷ୍ଟାର୍”ରେ ମୁଁ ରନର୍ଅପ୍ ହେଇଥିଲି । ସେହି ସମୟରେ ମୁଁ ପ୍ରଜ୍ଞା ଭାଇଙ୍କ ମିଷ୍ଟର ନନ୍ସେନ୍ସରେ ବି ଅଭିନୟ କରୁଥିଲି । ଓ-ଟିଭିରେ ବି କାମ କରିଛି ।
ପ୍ରଶ୍ନ ୪. ଅନେକ ହାସ୍ୟ କଳାକାରଙ୍କ ସହ ଆପଣ କାମ କରିଛନ୍ତି, ଅନେକଙ୍କର ନକଲ ମଧ୍ୟ କରିଛନ୍ତି, କାହା ସାଙ୍ଗରେ ଅନୁଭୂତି ସବୁଠାରୁ ବଢ଼ିଆ ଅଛି ଆଉ କାହିଁକି?
ଉତ୍ତର: ଯଦିଓ ଅନେକ ହାସ୍ୟ କଳାକାରଙ୍କ ସହ କାମ କରିଛି, କିନ୍ତୁ ପ୍ରଜ୍ଞା ଭାଇଙ୍କ ସହ ଅଧିକ ସମୟ ବିତେଇଛି, ଅଧିକ କାମ ତାଙ୍କ ସହ ହିଁ କରିଛି । ସେ ମୋତେ ସାନ ଭାଇ ଭଳି ଦେଖନ୍ତି ଆଉ ସାଙ୍ଗ ଭଳି ଆମର ସମ୍ପର୍କ । ଅଭିନୟ ଠାରୁ ଆରମ୍ଭ କରି ଅନେକି କିଛି ତାଙ୍କଠାରୁ ଅନେକ କିଛି ଶିଖିଛି ମୁଁ ।
ପ୍ରଶ୍ନ ୫. କାକାଙ୍କୁ ଟିକ୍ଟକ୍ ଫୋମସ୍ କରେଇଲା, ହେଲେ କାକା ଟିକ୍ଟକ୍ ବ୍ୟାନ୍ ହେବା ଆଗରୁ ତାକୁ ଡିଲିଟ୍ କରିଦେଲେ କାହିଁକି?
ଉତ୍ତର: ମୁଁ ତ ପ୍ରଥମରୁ ଟିକ୍ଟକ୍ ବ୍ୟବହାର କରୁନଥିଲି, ହେଲେ ଏହି ଲକ୍ଡାଉନ୍ ସମୟରେ ହିଁ ସାଙ୍ଗମାନଙ୍କର ପ୍ରରୋଚନାରେ ସେଇଠି ଭିଡିଓ କରିବା ଆରମ୍ଭ କରିଥିଲି । ହେଲେ ଚୀନର ସୈନ୍ୟମାନଙ୍କର ବିଶୃଙ୍ଖଳା ପାଇଁ ଯେବେ ଜନମାନସରେ ଟିକ୍ଟକ୍ ବିରୋଧରେ ସ୍ୱର ଉଠିଲେ । ସେବେ ମୁଁ ଡିଲିଟ୍ କରିଦେଲି । ଲୋକମାନଙ୍କ ପାଇଁ ମୋର ଭିଡିଓ ଭଲ ଚାଲିବା ଆରମ୍ଭ କଲା ଆଉ ସେହି ଲୋକମାନଙ୍କର ମତରେ ହିଁ ମୁଁ ଡିଲିଟ୍ କରିଦେଲି ।
ପ୍ରଶ୍ନ ୬. ମାତ୍ର କେଇଟା ଦିନରେ ୟୁ-ଟ୍ୟୁବ୍ରେ କାକାଙ୍କ ଚେନାଲ୍ ଆକଶ ଛୁଆଁ ହେଇଗଲା, ଏହା ଆପଣ କେବେ କଳ୍ପନା କରିଥିଲେ?
ଉତ୍ତର: ଭଗବାନଙ୍କର ଆଶୀର୍ବାଦ ଏବଂ ଆମର ଓଡ଼ିଆ ଦର୍ଶକଙ୍କର ଭଲପାଇବା ପାଇଁ ୟୁ-ଟ୍ୟୁବ୍ ବଢ଼ିଛି । ଆକାଶ ଛୁଆଁ ତ ନୁହେଁ, ହେଲେ ଦର୍ଶକମାନଙ୍କର ଭଲପାଇବା ପାଇଁ ବଢ଼ିଛି । ଆଗକୁ ଏମିତି ଲୋକମାନଙ୍କର ଭଲପାଇବା ମିଳିବ ବୋଲି ଆଶା ।
ପ୍ରଶ୍ନ ୭. ଆଗାମୀ ଦିନର ଯୋଜାନା କ’ଣ ଅଛି କାକାଙ୍କର?
ଉତ୍ତର: କାକାଙ୍କ ନାଁରେ ଯେହେତୁ ମୁଁ ଲୋକପ୍ରିୟତା ପାଇଛି, ତେଣୁ ମୋ ଚ୍ୟାନେଲ୍ରେ ମୁଁ କାକାଙ୍କୁ ନେଇକି ଭିଡିଓ କରିବି, କିଛି ଅଲଗା ଅଲଗା ଭିଡିଓ ବି କରିବାର ଅଛି, କିଛି ନୂଆ ନୂଆ ଚରିତ୍ର ମଧ୍ୟ ଦର୍ଶକଙ୍କ ପାଇଁ ଆଣିବାର ଅଛି । ଅନ୍ୟାନ୍ୟ ଚେନାଲ୍ରେ ବି ମୋର କାମ ନିଶ୍ଚୟ ଜାରି ରହିବ । ତା’ ସହିତ ଏବେ ଗୀତ ଗାଇବା ପାଇଁ କିଛି ସୁଯୋଗ ମିଳିଛି, ସେଥିରେ ବି ଆଗକୁ ଯିବାର ଅଛି ।
ପ୍ରଶ୍ନ ୮. ଆପଣଙ୍କୁ କାକା ଡାକିଲେ ଭଲ ଲାଗେ ନା ଗିରିଜା ଡାକିଲେ?
ଉତ୍ତର: କାକା ଡାକିଲେ ବି ଭଲ ଲାଗେ, ଗିରିଜା ଡାକିଲେ ବି ଭଲ ଲାଗେ । ଏବେ ତ ପ୍ରାୟ ସମସ୍ତେ କାକା ଚରିତ୍ରକୁ ପସନ୍ଦ କରୁଛନ୍ତି ଏବଂ କାକା ବୋଲି ବି ଡାକୁଛନ୍ତି, ଗିରିଜା ବୋଲି ବି ଡାକୁଛନ୍ତି । ସେମିତି କିଛି ନାହିଁ, ଯାହା ଡାକିଲେ ବି ଭଲ ଲାଗିବ, ନାମରେ କିଛି ନାହିଁ, ମୋ କାମ ଦର୍ଶକମାନଙ୍କୁ ପସନ୍ଦ ଆସୁଛି, ତାହା ମୋ ପାଇଁ ବଡ଼କଥା ।
ପ୍ରଶ୍ନ ୯. ଏବେ ଜଣେ ଜଣାଶୁଣା ହାସ୍ୟ ଅଭିନେତା ହେବାପରେ କ’ଣ ପରିବର୍ତ୍ତନ ହେଇଛି ଗିରିଜାଙ୍କ ଠାରେ?
ଉତ୍ତର: ୨୦୧୫ରୁ ଯଦିଓ ମୁଁ କାମ କରିବା ଆରମ୍ଭ କଣିଲି ତଥାପି ଦୀର୍ଘ ଦିନର ପରିଶ୍ରମ ପରେ ଏବେ ଲୋକମାନେ ପସନ୍ଦ କରୁଛନ୍ତି ୟୁ-ଟ୍ୟୁବ୍ରେ ଭିଡିଓ ଭ୍ୟୁ ବି ବଢ଼ୁଛି ଆଉ ସବୁଠାରୁ ବଡ଼ କଥା ହେଲା, ଆୟ ବି ଟିକେ ବଢ଼ିଛି । କିନ୍ତୁ ମୋ ନିଜ ଭିତରେ ସେମିତି କିଛି ପରିବର୍ତ୍ତନ ହେଇନାହିଁ । ଆଗରୁ ଯେମିତି ଥିଲି, ଏବେ ସେମିତି ଅଛି, ଆଗରୁ ହସେଇବାକୁ କାମ କରୁଥିଲି, ଏବେ ବି ହସେଇବାକୁ କାମ କରୁଛି ଏବଂ ଆଗକୁ କରିବି ମଧ୍ୟ ।
ପ୍ରଶ୍ନ ୧୦. ଏହି ଲକ୍ଡାଉନ୍ ଆପଣଙ୍କ ପାଇଁ କେମିତି ଥିଲା?
ଉତ୍ତର: ଲକ୍ଡାଉନ୍ ସବୁ ରୋଜଗାର ବନ୍ଦ ହେଇଯାଇଥିଲା, ଲୋକମାନେ ଦୁଃଖରେ କାଳାତିପାତ କରୁଥିଲେ ଆଉ ସେହି ବେଦନାରୁ ବାହାରିବାକୁ ମୁଁ ଏହି ଭିଡିଓ ସବୁ କରୁଥିଲି ଏବଂ ଭଗବାନଙ୍କ ଦୟାରୁ କିଛିମାତ୍ରାରେ ସଫଳ ବି ହେଲି । ଲକ୍ଡାଉନ୍ର ପ୍ରଥମ କେଇଦିନ ଯେମିତି ଦୁଃଖଭରା ଥିଲା, ପରବର୍ତ୍ତୀ ସମୟରେ ସେମିତି ଭଲ ହେଇଥିଲା । ମୋଟାମୋଟି ଭାବରେ କହିବାକୁ ଗଲେ ଦୁଃଖସୁଖ ମିଶିକି ଥିଲା ।
ଧନ୍ୟବାଦ ଗିରିଜା ବାବୁ, ଆପଣଙ୍କର ମୂଲ୍ୟବାନ ସମୟ ବାହାର କରି ଆମର ସମସ୍ତ ପ୍ରଶ୍ନର ଉତ୍ତର ରଖିଥିବାରୁ । ଆଗକୁ ଆପଣଙ୍କର ସଫଳତାର କାମନା କରୁଛି । ଜୟ ଜଗନ୍ନାଥ !
– ସଂଗ୍ରାମ କେଶରୀ ସେନାପତି
Comments
ସଂଗ୍ରାମ କେଶରୀ ସେନାପତି, ଶୁଭପଲ୍ଲବ ଓଡ଼ିଆ ଇ-ପତ୍ରିକାର ପ୍ରତିଷ୍ଠାତା ତଥା ସମ୍ପାଦକ । ସେ ଓଡ଼ିଆରେ ଗଳ୍ପ, ପ୍ରବନ୍ଧ ଆଦି ଲେଖାଲେଖି କରନ୍ତି ଏବଂ ଓଡ଼ିଆ ଉଇକିମିଡ଼ିଆର ବିଭିନ୍ନ ପ୍ରକଳ୍ପରେ ପ୍ରାୟତଃ କାର୍ଯ୍ୟ କରନ୍ତି ।
