ଦୀପାବଳି ଦୀପର
ହାଲକା ଆଲୁଅରେ
ଝାପସା ଭାବେ
ଦେଖିଥିବା ସେଇ ହସ,
ହୃଦୟକୁ ଗଭୀର ଭାବେ
ଆଘାତ କରିଛି,
ସେଇ ହସକୁ ଭୁଲିବା
ଭାରି କଷ୍ଟ ହେଉଛି ।
ବୋଧେ ପ୍ରେମରେ
ହେଉଥିବା ମିଠା ଦରଦର
କିଛିଟା ଆଭାସ ହେଉଛି,
ତାକୁ ଦେଖି
ଲାଗିଲା ଯେମିତି
ଅମାବାସ୍ୟା ରାତିରେ ଜହ୍ନ
ଭୁଲରେ ତା’ ପାଦ
ପଦାକୁ କାଢ଼ି ଦେଇଛି ।
ମୁରୁଜ ରଙ୍ଗରେ
ତା’ ହାତ ରଙ୍ଗେଇ ଯାଇଛି
ଯେମିତି ନିର୍ମଳ ଆକାଶକୁ
ଇନ୍ଦ୍ରଧନୁ ସାତରଙ୍ଗେ
ରଙ୍ଗେଇ ଦେଇଛି ।
ସେଦିନ ସନ୍ଧ୍ୟାରେ
ମୋ ହୃଦୟକୁ
ପ୍ରେମଦୀପ ଆଲୋକିତ କରିଦେଲା,
ମୋ ମନର ଭାବନା
ଘିଅର କାମ କଲା,
ସେଦିନ ମୋ ହୃଦୟ
ପ୍ରେମ ଶିଖିଗଲା ।
– ସୁନିତା ପଟେଲ
Comments
ସୁନିତା ପଟେଲ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
