ବହୁ ବାଟ ଆଗେଇ ଆସିଲା ପରେ
ପୁଣି ବଞ୍ଚିବାକୁ ଇଚ୍ଛା ହେଲା
ପଛକୁ ଫେରି
ଅତୀତର ବର୍ତ୍ତମାନରେ,
ହେଲେ ପାଦ କହିଲେ
ଆମେ ବାଟୋଇ ଅଫେରା ବାଟର ।
ଜୀବନର ରାଜପଥ ଉପରେ
ଆଙ୍କିଲି କିଛି ସ୍ମୃତିଚିତ୍ର,
ନିଜକୁ ବି ସାଇତିବାର ଚେଷ୍ଟା କରିଥିଲି
ପିଲାବେଳର କାନ୍-ଭାସ୍ ଉପରେ;
ବୟସ କହିଲା
ମୁଁ ଅଫେରା ।
ସମୟ ପାଖରେ ନେହୁରା ହେଲି
ଥରଟେ ବୁଲାଇ ନେବାକୁ
ପଛରେ ଛାଡ଼ି ଆସିଥିବା
ଭଙ୍ଗା ସ୍ୱପ୍ନର ବେଳାଭୂମି ଆଡ଼େ
କାଳେ ପୁଣି ଥରେ ସଜାଡ଼ି ପାରିବି
ବିଶ୍ୱାସର ଧୂଳିସାତ୍ ବାଲିଘର;
ସମୟ ହସିଦେଇ କହିଲା
ମୁଁ ସେଇ ଅଫେରା ନଈ
ଯାହା ପାଖରେ ହାର ମାନେ
ଜୀବନର ଅନୁରୋଧ ପତ୍ର ବି ।
ଶେଷରେ ମୁଁ ବି ହାରିଗଲି
ଆଉ ମୋ ପରାଜୟରେ ସାମିଲ୍ ଥିଲା
ମୋ ବର୍ତ୍ତମାନ ।
– ଅର୍ପିତା ମିଶ୍ର
Comments
ଅର୍ପିତା ମିଶ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
