ଆସ ଯୁଦ୍ଧ ଦେଖିବ
ସିପାହୀର ଘର ସମ୍ମୁଖରେ ଛିଡ଼ା ହେଇ
ଫୁଟୁ ନଥିବ ବନ୍ଧୁକ
ତୁଟୁ ଥିବ କାହା ହାତର ଚୁଡ଼ି
ନଥିବ ବାରୁଦ, କରୁଣ ବିଳାପ ଆକାଶରେ
ଯାଉଥିବ ଉଡ଼ି
ପୋଡ଼ା ଶବର ଗନ୍ଧ, ମଶାଣୀରେ ଗହଳି
ଅଗଣା ଶାନ୍ତ ଆଉ ନିସ୍ତବ୍ଧ ଯୁଦ୍ଧଅନ୍ତେ ଯୁଦ୍ଧ ଭୂମି ପରି
ସ୍ୱପ୍ନମାନେ ଯୁଦ୍ଧ କରୁଥିବେ ରାତି ସହ
ନିଦମାନେ ଲୁହ ସହ
ଦୁଇ ମୁଠା ଚାଉଳ ଧରିଥିବ ହାଣ୍ଡିର ଘଣ୍ଟିକା
ସିନ୍ଦୁର ଫିକା ପଡ଼ିବାକୁ
ସିନ୍ଥି ସହ ଯୁଦ୍ଧ କରୁଥିବ ଏକା
ଆଶା ଜଷ୍ଟି ପାଦ ସହ ଯୁଦ୍ଧ କରିବ
ଓଷଦ ଓଠକୁ ଦୂରରୁ ଫିଙ୍ଗିବ ଅଭାବର କ୍ଷେପଣାସ୍ତ୍ର
ଶୀତଳ ଯୁଦ୍ଧରେ ମାତିବେ
ଦେହ ଆଉ ବସ୍ତ୍ର
ଏଇ ମଉକା ଦେଖି, ଅନ୍ଧତ୍ୱ ସୈନ୍ୟ ସାମନ୍ତ ଆଣି
କବଳିତ କରିବ ବଣ ପାହାଡ଼ ଘେରା ନେତ୍ର
ଯୁଦ୍ଧ ଚାଲିବ
ପାଦର, ଫୁଟା ଚପଲ ସହ…
ଚପଲ ସହ ସନ୍ଧି କରି ରାସ୍ତାର ଗୋଡ଼ି
ଅତର୍କିତ ଆକ୍ରମଣ କରିବେ
ରାସ୍ତା ମଝିଟାରେ ଲହୁକୁ ନିଗାଡ଼ି ॥
– ତୃପ୍ତି ରଞ୍ଜନ ଦାସ
Comments
ଡ. ତୃପ୍ତି ରଞ୍ଜନ ଦାସ ପଦାର୍ଥ ବିଜ୍ଞାନରେ ପିଏଚ୍.ଡି କରିସାରିବା ପରେ ଏବେ ପ୍ରାଧ୍ୟାପକ ଭାବରେ କାର୍ଯ୍ୟ କରୁଛନ୍ତି । ସେ ଓଡ଼ିଆ ଭାଷାରେ ବିଭିନ୍ନ ପ୍ରକାର ଗପ ଓ କବିତା ଆଦି ରଚନା କରନ୍ତି । କଳା କ୍ଷେତ୍ରରେ ରୁଚି ରଖୁଥିବା ତୃପ୍ତିଙ୍କର ଦୁଇଟି କବିତା ସଂକଳନ ଓ ଗୋଟିଏ ଉପନ୍ୟାସ ପ୍ରକାଶ ପାଇସାରିଛି; ତନ୍ମଧ୍ୟରୁ ତାଙ୍କର ପ୍ରଥମ କବିତା ସଂକଳନଟି ଓଡ଼ିଶା ସାହିତ୍ୟ ଏକାଡେମୀ ପୁରସ୍କାରରେ ମନୋନୀତ ହୋଇଥିଲା ।
