ତୁମ ଆକାଶର ଜହ୍ନ ମୁଁ
ହଜି ଯାଇଛି ମେଘ ମାଳାରେ,
ରାତ୍ରୀ ଗୋପନେ ମେଘ ହଟିଗଲେ
ଫେରିବି ଅମୃତ ବେଳାରେ ॥
ସାମୟିକ ଆମ ବିରହ ବିଚ୍ଛେଦ
ମଳୟର ଗନ୍ଧେ ପୁଲକିତ,
ପ୍ରାଣର ଉଷ୍ମତା, ଅପ୍ରତିମ ସ୍ନେହ
ମର୍ମ ଭାବାବେଗ ବିଜଡ଼ିତ ॥
ଆସିବି ନିଶ୍ଚୟ ସ୍ୱପ୍ନକୁ ତୁମର
କରିବାକୁ ଶଙ୍କା ଦୂରୀଭୂତ,
ମିଳନ ବୁଭୁକ୍ଷୁ ଅଶରୀର ମୋହ
କରିବ ତୁମକୁ କବଳିତ ॥
ପ୍ରେମ ଆଲିଙ୍ଗନେ ହଜିଯିବ ତୁମେ
ମୋର ଶ୍ୱେତ ସ୍ନିଗ୍ଧ ଜୋଛନାରେ,
ଅଳପ ସମୟ ବିରତି ପାଇଁ କି
କାହିଁ ହୁଅ ଏତେ ଆନମନାରେ ॥
– ବିଶ୍ୱନାଥ କିଙ୍କର ରାଉତ
Comments
ବିଶ୍ୱନାଥ କିଙ୍କର ରାଉତ ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
