ସାଗର ଦୁହିତା ଦେବୀ ଲକ୍ଷ୍ମୀ ନାରାୟଣୀ
ଧନଦାତ୍ରୀ କମଳିନୀ ବିଷ୍ଣୁଙ୍କ ଘରଣୀ ॥
ବର୍ଷ ମଧ୍ୟେ ଶ୍ରେଷ୍ଠ ମାସ ଅଟେ ମାର୍ଗଶିର
ସେ ମାସର ଗୁରୁବାର ଅତି ପ୍ରିୟ ତୋ’ର ॥
ସେଦିନ ଉଷାରୁ ଉଠି କରି ଶୁଚି ମନ
ଘରର ଘରଣୀ ମାନ କରନ୍ତି ପୂଜନ ॥
ଦୁବ ଚନ୍ଦନ ସିନ୍ଦୁରଗେଣ୍ଡୁ ପଦ୍ମଫୁଲ
ଜାଳି ଦ୍ୟନ୍ତି ଧୂପଦୀପ ଆଳତୀ କର୍ପୂର ॥
ବଢ଼ା ହୁଏ ଭୋଗ ପାଇଁ ନାନାଦି ବ୍ୟଞ୍ଜନ
ଫଳମୂଳ ଖିରି ପିଠା ଭାତ ଯେ ତିଅଣ ॥
ନାନା କୁସୁମେ ମଣ୍ଡିତ ଲକ୍ଷ୍ମୀ ମହାମାୟୀ
ଦୁଃଖିଙ୍କର ଦୁଃଖ ନେତ୍ରେ ନ ପାରନ୍ତି ଚାହିଁ ॥
ପଡ଼େ ଶୁଭ ଶଙ୍ଖଧ୍ୱନୀ ଶୁଭେ ହୁଳହୁଳି
ଉତ୍ସାହ ଆନନ୍ଦ ଘରେ ପଡ଼ଇ ଉଚ୍ଛୁଳି ॥
ଘରେ ଘରେ ପୁରେ ପୁରେ ଲକ୍ଷ୍ମୀ ବିରାଜନ୍ତି
ଧନଧାନ୍ୟ ମନସ୍କାମ ପୂରଣ କରନ୍ତି ॥
ତୋ’ର କୃପା ବଳେ ମା’ଗୋ ନର ପାଏ ମୁକ୍ତି
ଯାଚି ଦେଉ କୋଟି ସୁଖ ଐଶ୍ଵର୍ଯ୍ୟ ସମ୍ପତ୍ତି ॥
କୃପାକର କୃପାମୟୀ ସଂସାର ପାଳିନୀ
ପଡ଼ିଦାତ୍ରୀ ଅନ୍ନପୂର୍ଣ୍ଣା ଜଗତ ଜନନୀ ॥
ପଦ୍ମ ବିଳାସିନୀ ଲକ୍ଷ୍ମୀ ଦୁଃଖ ବିନାଶିନୀ
କରୁଛି ଜଣାଣ ମାଗୋ ଘେନ ମୋ ଦୟିନୀ ॥
– ମମତା ସାହୁ
Comments
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
