ଗାଆଁରୁ ବାହାନା ନେଇକି ବାହାରି ଯାଇଥିବା ଅମିତକୁ ଲିପି ପଚାରିଲା, “ଏବେ ତ ସବୁ ବନ୍ଦ ହେଇ ପଡ଼ିଛି । କିଟ୍ ଆଣିବାକୁ କେତେ ଦିନ ଲାଗିବ ଯେ? ମୋତେ ବହୁତ ଭୟ ଲାଗୁଛି ।”
ଓହୋ ! ମୁ କ’ଣ ହାତ ଯୋଡ଼ିକି ଘରେ ବସିଛି କି? ଜାଣି ପାରୁନ? ଲକ୍ ଡାଉନ୍ ଚାଲିଛି ପରା? ଅମିତର ଚଢ଼ା ଗଳାର ଉତ୍ତରଟା ଲିପିକୁ ଟିକେ କେମିତି ଅଡ଼ୁଆ ଲାଗିଲା । ଦୂରଭାଷକୁ ରଖି ରଖି ମନରେ ଭାବୁଥିଲା କାହିଁକି କେଜାଣି ଭୁଲ୍ ହେଇଗଲା ତା’ ଦେଇ ।
ସକାଳୁ ଉଠି ପୁଣି ଆଉଥରେ ଅମିତକୁ ରିଂ କଲା ସେ? କୋଭିଡ୍ ସଚେତନତା ପରେପରେ ଅମିତର ସ୍ୱର ଶୁଣିବାକୁ କାନଟାରେ ଭଲକି ଫୋନକୁ ଲଗେଇକି ରଖିଲା ଯେମିତି କେହି ନ ଶୁଣିପାରିବେ, ହେଲେ ଉତ୍ତର ଆସୁଥାଏ “ନମ୍ବର ଟି ବନ୍ଦ ଅଛି ।”
ଆଜି ଲିପିର ବାପା ଆସି ଲିପି ବୋଉକୁ କହିଲେ, ଶୁଣୁଛ ଆମ ଝିଅର ପୋଷ୍ଟ ମର୍ଟମ୍ ପର ଟେଷ୍ଟରେ କୋରନା ନେଗେଟିଭ ଆସିଛି । ପଡ଼ିଶା ଘରକୁ କହିଦେବ ଆଉ ସନ୍ଦେହ କରିବେନି ।
(ହେଲେ ଲିପି ଜାଣିଥିଲା କୋଉଟା ପଜିଟିଭ ଆସିବାର ଅଛି । ଆଉ ସେଇଟା ଶୁଣିବାକୁ ଧୈର୍ଯ୍ୟ ନଥିଲା ଲିପି ପାଖେ ।)
– ଅମୃତାଂଶୁ ପଣ୍ଡା
Comments
ଅମୃତାଂଶୁ ପଣ୍ଡା ପେଶାରେ ଜଣେ ଆଇଟି କର୍ମଚାରୀ ହେଲେ ମଧ୍ୟ ଓଡ଼ିଆ ଗଳ୍ପ, କବିତା ଆଦି ରଚନା କରିବା ସହ ଓଡ଼ିଆ ଭାଷାରେ ବିଭିନ୍ନ ପ୍ରକାରର ବ୍ୟଙ୍ଗ ଏବଂ ଥଟ୍ଟାମଜା ଆଦି ରଚନା କରନ୍ତି ।
