ଭକତକୁ ଆଜି ଶିରିକ୍ଷେତ୍ର ମନା
ମନା ପୁଣି ତୋର ବଡ଼ ଦାଣ୍ଡେ
କ’ଣ ତୁହି କଲୁ, କି ମାୟା ରଚିଲୁ,
ଭକ୍ତ କାନ୍ଦୁଥାନ୍ତି, ହାତ ରଖିଦେଇ ମୁଣ୍ଡେ ॥
ଗରୁଡ଼ ଆଗରେ ବେନି ଭୁଜ ଟେକି
ସପନ ହୋଇଲା ତୋ’ର ଦର୍ଶନ
କ’ଣ ତୁହି କଲୁ, କି ମାୟା ରଚିଲୁ
ଦେଖିବାକୁ ଥରେ ବିକଳ ହୁଏ ଏ ମନ ॥
ଆନନ୍ଦ ବଜାରେ ଆନନ୍ଦ ସାଉଁଟା
ଆଜି ତ ସଭିଙ୍କୁ ହୋଇଛି ମନା
ହେ ପ୍ରଭୁ ତୁମ ଅଭଡ଼ା ଖଳାରେ ବସି
ଅଭଡ଼ା ଦେଖିବା ହେଲା ସାତ ସପନ ॥
କୋଉଠି କାହାର ଆଜି ନଜର ଲାଗିଛି
ଭକ୍ତ, ଭଗବାନ ଦିବ୍ୟ ଓ ପାବନ ସମ୍ପର୍କରେ
ସେ ନଜରକୁ କାଟି, ଆହେ ଚକା ଆଖି
ଶୀଘ୍ର ଦିଅ ଦର୍ଶନ ତୁମ ବଡ଼ଦେଉଳେ ॥
ଭକ୍ତ ଆଜି ଝୁରେ ତା’ ଭଗବାନଙ୍କୁ
ଭଗବାନ ବି ଝୁରନ୍ତି ତାଙ୍କ ଭକ୍ତଙ୍କୁ
କେବେହେବ ପୁଣି ସେ ଅପୂର୍ବ ମିଳନ
ପୁଣି ଶୁଖିବ ଭକ୍ତର ବେନି ନୟନ ॥
ଦର୍ଶନ ନପାଇ ତୋହରି କାଳିଆ
ଭକ୍ତ ଆଖିରୁ ଝରଇ ଲୋତକ
ସେ ଲୋତକ ଝରି ଓଦା କରିଦିଏ
ଭକ୍ତ ପିନ୍ଧିଥିବା ବସନକୁ ॥
କୋଟି ଓଡ଼ିଆର ମଉଡ଼ମଣି ତୁ
ନିବେଦନ କରେ ତୋ’ର ପଦତଳେ
ଏ ମହାମାରୀକୁ ଦୂରେଇ ଦେଇ ତୁ
ପୁଣି ଦର୍ଶନ ଦେ ତୋ’ ବଡ଼ଦେଉଳେ ॥
ହେ ପ୍ରଭୁ ଶୀଘ୍ର ଚଳ ଚଞ୍ଚଳ
ହେଉ ତୁମ ବଡ଼ ଦାଣ୍ଡ,
ପୁଣି ଆନନ୍ଦ ବଜ଼ାର,
ଓ ମହୋଦଧି କୂଳ ॥
– ବିଶ୍ୱରଂଜନ ତ୍ରିପାଠୀ
Comments
ବିଶ୍ୱରଂଜନ ତ୍ରିପାଠୀ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
