ଯାହା କିଛି କ୍ଷଣ ଅଟକାଇ ଦିଏ
ମୋ ଭିତରେ ଦୌଡ଼ୁଥିବା
ଏକ ଦିଗହରା ବୟସକୁ
ଧରେଇ ଦିଏ ହାତରେ ଏକ ତୂଳୀ
ଆଙ୍କିବାକୁ କୁହେ ଏକ
ଚିର ଇପ୍ସିତ ଅଫେରା ଋତୁକୁ…
ଦେଖୁ ଦେଖୁ ମୁଁ ଅଙ୍କେ
ଆଙ୍କେ ତୁମକୁ, ତୁମ ଉପସ୍ଥିତିର
ପ୍ରିତୀ ପ୍ରାଣସ୍ପର୍ଶୀ ମୁହୂର୍ତ୍ତକୁ,
ଆଉକିଛି ଦିଗନ୍ତ ବିସ୍ତାରି
ତରୁଣ ସ୍ମୃତି ତାଜା ହୁଏ,
ଫୁଟି ଉଠେ ମଗୁଶୁରିଆ କୁହୁଡ଼ିରେ
ଭିଜା ଭିଜା କାନ କୁହା କଥା,
ହାତ ଧରି ଭିଡ଼ି ନିଏ
କେଉଁ ଅଜଣା ଆତ୍ମୀୟ ପାରିଧିକୁ…
ଓଠ ହସେ, ମନ ନକହି କୁହେ
ଆଉ ତୁମେ ନଶୁଣି ଶୁଣ
ମୋ ନାଆଁରେ ଉଡୁଥିବା ଯେତେ
ସବୁ ଲୁଚା ଛପା ଗୁମରକୁ,
ଏମିତି ହିଁ ଥାଏ ସବୁ ଆତ୍ମୀୟୟତା
ଲେଖି ଦିଏ ଆମ ଭିତରେ ଆମକୁ
ବିନା ସନ୍ଦେହରେ ସଜାଡ଼ି ଦିଏ
ଯେତେ ସବୁ ଅସଜଡା ଅଭିମାନକୁ ।
– ରାଜେଶ ରଥ
Comments
ରାଜେଶ ରଥ ଜଣେ ଓଡ଼ିଆ ଗାଳ୍ପିକ ତଥା କବି । ସେ ଓଡ଼ିଆ ଭାଷାରେ ବିଭନ୍ନ ପ୍ରକାରର ଗଳ୍ପ ରଚନା କରନ୍ତି, ଯାହାକି ଅନେକ ପତ୍ରପତ୍ରିକା ସ୍ଥାନ ପାଇଛି । ଗଞ୍ଜାମ ଜିଲ୍ଲାର ଆସ୍କାର ଅଧିବାସୀ ରାଜେଶ ପେଶାରେ ଜଣେ ଗଣିତ ଶିକ୍ଷକ ।
