ତୁ ଶୋଷର ସମୁଦ୍ର
ମୁଁ ଜୁଆରିଆ ନଈ
ତୁ ଅଶାନ୍ତ ଅବୁଝା
ମୁଁ ବାଟ ଭୁଲୁଥାଇ ।
ତୁ ତୁଠ ପଥରଟେ
ମୁଁ ଅଳତାର ପାଦ
ତୁ କାଶତଣ୍ଡୀ ପଠା
ମୁଁ ହଜୁଥିବା ନିଦ ।
ତୁ ଜହ୍ନର ଗଜଲ୍
ମୁଁ ଶୀତଳ ସମୀର
ତୁ ଦୂବଘାସ ହେଲେ
ମୁଁ ସକାଳ କାକର ।
ତୁ ନିଦାଘର ତାତି
ମୁଁ କୃଷ୍ଣଚୂଡ଼ା ଫୁଲ
ତୁ ମରୁଭୂମି ଶୋଷ
ମୁଁ ମରିଚିକା ଧାର ।
ତୁ ଶ୍ରାବଣ ବରଷା
ମୁଁ କାଗଜର ନାଆ
ତୁ ସୀମାରେଖା ଗାର
ମୁଁ ପ୍ରୀତି ଝରା ଗାଆଁ ।
ତୁ ପୁନେଇଁର ଜହ୍ନ
ମୁଁ ଖଇର ଆଞ୍ଜୁଳି
ତୁ ମହୁଆ ପବନ
ମୁଁ ଝରା ଶେଫାଳୀ ।
ତୁ ବସନ୍ତର ରାସ
ମୁଁ ବିରହ ରାଗିଣୀ
ତୁ ମୁଠାଏ ଅବିର
ମୁଁ ଲେଖୁଛି କାହାଣୀ ।
ତୁ ବଇଁଶୀର ସୁର
ମୁଁ ସଞ୍ଜର ଗୋଧୂଳି
ତୁମ ମିଳନ କୁଞ୍ଜକୁ
ମୁଁ ହେଉଥାଏ ଝୁରି ।
– ମହାସ୍ମୀତା ଓଝା
Comments
ମହାସ୍ମୀତା ଓଝା ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
