ମୁଁ ଜାଣେନା ମୁଁ ଗଲାପରେ
କିଏ କେମିତି ଝୁରିବ
କିଏ ଲୁହ ଢାଳିବ କି ନାହିଁ
ମା’ଟି ମୋର ପଣତ ତଳେ
ମୁହଁକୁ ଲୁଚେଇ
କଇଁ କଇଁ କାନ୍ଦିବ ॥
ମୁଁ ଜାଣେନା ମୁଁ ଗଲାପରେ
ମୋ ସାହସ ପଣକୁ କିଏ ଗୁଣିବ
ବାପାଟି ମୋର
ଗୁଣ ଗୁଣ ଗାନ କରି
କନ୍ଥରେ ମୁଣ୍ଡ ପିଟିବ ॥
ମୁଁ ଜାଣେନା ମୁଁ ଗଲା ପରେ
ପୁଅଟି ମୋର କାହା ପାଖେ
ଅଳି କରିବ ନୀତି
ଝିଅଟି ମୋର ଅତି ନିରୀହ
ଝୁରିବ ଦିନ ରାତି ॥
ମୁଁ ଜାଣେନା ମୁଁ ଗଲା ପରେ
ପରିବାର ଶୂନ୍ୟ ଲାଗିବକି ନାହିଁ
ସ୍ଵାମୀଟି ମୋର ବିରହରେ
ଜଳିବ ସବୁ କ୍ଷଣ ସବୁ ରାତି ॥
ମୁଁ ଜାଣେନା ମୁଁ ଗଲାପରେ
ମୋ ପ୍ରିୟ ବନ୍ଧୁମାନେ
ମୋତେ ମନେ ରଖିବେକି ନାହିଁ
ଶତ୍ରୁମାନେ ନିଶ୍ଚୟ ଖୁସି ହେବେ
ଆଉ ନାହିଁ ବୋଲି କହି ॥
ମୁଁ ଜାଣି ନି ମୁଁ ଗଲା ପରେ
ମୁଁ ପାପ କରିଛି ନା ପୁଣ୍ୟ କରିଛି
ଗାଁ ଗଣ୍ଡା ମୁଖେ ଭଲ ମନ୍ଦର
କର୍ମ ଫଳ ନେଇ ମୁଁ ଯାଉଛି ॥
– ସସ୍ମିତା ନାୟକ
Comments
ସସ୍ମିତା ନାୟକ ପୁରୀ ଜିଲ୍ଲାର କାକଟପୁର ସ୍ଥିତ ନାଇଗୁଆଁର ବାସିନ୍ଦା । ସେ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
