– କେମିତି ଅଛୁ?
– ଭଲ ଅଛି…!
– ଆରେ କେମିତି ଅଛୁ ?
– ହଁ ଭଲ ଅଛି…!
– ସତ କହ, କେମିତି ଅଛୁ, ସତରେ ଭଲ ଅଛୁ…?
– ……………….(ନିରୁତ୍ତର)
ସତରେ କ’ଣ ସମସ୍ତେ ଭଲରେ ଥା’ନ୍ତି??? ବିଶ୍ୱ ସ୍ୱାସ୍ଥ୍ୟ ସଂଗଠନର (WHO) ତଥ୍ୟ ଅନୁସାରେ ଭାରତ ଦେଶରେ ପ୍ରତି ୨୦ ଜଣ ଲୋକରେ ଜଣେ ଡିପ୍ରେସନ ମାନେ ମାନସିକ ଅବସାଦରେ ପିଡ଼ୀତ । ଆଉ ଆତ୍ମହତ୍ୟା କରୁଥିବା ଲୋକଙ୍କ ମଧ୍ୟରେ ୧୫ରୁ ୩୫ ବର୍ଷୀୟ ବୟସ୍କଙ୍କ ସଂଖ୍ୟା ଅଧିକ । ଏହି ମାନସିକ ଅବସାଦ କୌଣସି ମହାମାରୀଠୁଁ କମ ନୁହଁ । ତେଣୁ ଏକ ଅନୁରୋଧ, ଏହାକୁ ଏକ ଛୋଟିଆ ଜିନିଷ ବୋଲି ଭାବନ୍ତୁ ନାହିଁ । ଏହା କେବଳ ଏକ ‘ମନ ଖରାପ’ ନୁହଁ, ବା ଏହା ସମସ୍ତଙ୍କୁ ହୁଏନା, ନା ଏହା ଆପେ ଆପେ ଭଲ ହୁଏ । ଏଥିପାଇଁ ସାହାଯ୍ୟ ଦରକାର, ଏଥିପାଇଁ କଥା ହେବାକୁ ପଡ଼େ ଏବଂ କିଛି ଲୋକ ଭାବିପାରନ୍ତିନି ଯେ ଯେଉଁ ଲୋକ ଏଭଳି ପରିସ୍ଥିତିରେ ଥିଲା, ସେ ମୋ ପାଖକୁ କାହିଁକି ଅସିଲାନାହିଁ? ମୁଁ ହୁଏତ ତା’ କଥା ଶୁଣିଥାନ୍ତି । ସେ ଏକ ଚରମ ପଦକ୍ଷେପ ନେବାପୂର୍ବରୁ ତା’ର ନିଜ ଲୋକଙ୍କ ପାଖକୁ କାହିଁକି ଗଲାନାହିଁ? କିନ୍ତୁ ଆମକୁ ବୁଝିବାକୁ ହେବ ଯେ ସେହି ମଣିଷଟି ସେପରି ମାନସିକ ଅବସ୍ଥାରେ ହିଁ ନାହିଁ ଯେ ସେ ତା’ର ମନର କଥାଗୁଡ଼ିକୁ କହିପାରିବ । ଏଭଳି ପରିସ୍ଥିତିରେ ଆମ ସମସ୍ତଙ୍କୁ ଆଉ କିଛି ସଚେତନ ହେବାକୁ ପଡ଼ିବ । ଯଦି ଆମ ପ୍ରିୟଜନଙ୍କ ଭିତରୁ କାହାକୁବି ଯଦି ଏପରି ଅସ୍ୱାଭାବିକ ଭାବେ ଦେଖୁ, ତା’ହେଲେ ସେମାନଙ୍କୁ ପଚାରିବାକୁ ପଡ଼ିବ, “ସତ କହ, କେମିତି ଅଛୁ, ସତରେ ଭଲ ଅଛୁ ତ?”
ସାବଧାନରେ ରୁହନ୍ତୁ, ଭଲ ରୁହନ୍ତୁ, ଖୁସିରେ ରୁହନ୍ତୁ । ଯାହା କଲେ ନିଜକୁ ଭଲ ଲାଗେ ତାହା କରନ୍ତୁ, ଆମ ସମୟଟା ଭାରି ଅନିଶ୍ଚିତ । ମଣିଷ ବହୁତ ଏକା, ଏହି ଏକୁଟିଆ ମଣିଷ ଏହି ନିଷ୍ଠୁର ପୃଥିବୀରେ ବଞ୍ଚିବାକୁ ସଂଘର୍ଷ କରିବା ମଧ୍ୟ ଏକ କାଠିକର ପାଠ । ଏଭଳି ପରିସ୍ଥିତିରେ ଯଦି ଆମେ ନିଜେ ଖୁସିରେ ରହିଲେ ବା ନିଜ ଖୁସି ଅନ୍ୟକୁ ବାଣ୍ଟି ଅନ୍ୟ କାହାକୁ ଖୁସି କରେଇପାରିଲେ, ତା’ ହେଲେ ଏ ନିଷ୍ଠୁର ପୃଥିବୀରେ ବଞ୍ଚିବାର ଦୌଡ଼ରେ ଏହା ଏକ ଛୋଟ ଅବଦାନ ନୁହେଁ । ଆମେ ସମସ୍ତେ ଯଦି ଏପରି ଭାବିବା, ତା’ ହେଲେ ଦିନ ଆସିବ ଆମେ ସମସ୍ତେ ସଗର୍ବେ କହିପାରିବା, “ହଁ ଭଲ ଅଛି ।”
– ଅଶୋକ ମିଶ୍ର
Comments
ଅଶୋକ ମିଶ୍ର ପେଶାରେ ଜଣେ ସଫ୍ଟଓୟାର୍ ଇଞ୍ଜିନିୟର୍ । ସେ ତାଙ୍କର ଫାଙ୍କା ସମୟରେ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ରଚନା କରିଥାନ୍ତି । ତାଙ୍କ ରଚିତ କିଛି ଗଳ୍ପ ବିଭିନ୍ନ ପତ୍ରପତ୍ରିକାରେ ସ୍ଥାନିତ ହୋଇଛି ।
