ବାଲି ଗୋଡ଼ି ଭାତ କାଦୁଅ ତର୍କାରୀ
ଶଢ଼ାଇ ହାଣ୍ଡି କଡ଼େଇ
ଗାଁ ଦାଣ୍ଡ ଧୂଳି କେତେ ବୋଳା ବୋଳି
ସଞ୍ଜ ଆସୁଥାଏ ନଇଁ ।
ଚାଟଶାଳୀ ପାଠ କାନ୍ଧରେ ବସ୍ତାନି
ଅବଧାନେ ବେତ ମାଡ଼
ବାପା ବୋଉ ଜେଜେ ସଭିଏଁ କୁହନ୍ତି
ପାଠପଢ଼ ପାଠପଢ଼ ।
ପହିଲି ପୀରତି ମିଳନର ଗୀତି
ବିରହ ଅଲିଭା ଦାଗ
ଜୀବନ ଜଞ୍ଜାଳ ଛୋଟିଆ ସଂସାର
କେତେ ରାଗ ଅନୁରାଗ ।
ବୟସର ଶେଷ କେତେ ଅବଶୋଷ
କେତେ ମିଠା ଅନୁଭୂତି
ଗାଁ ମଶାଣିରେ ଦେହ ଜଳୁଥାଏ
ଜୀବନର ହୁଏ ଇତି ।
– ସିଦ୍ଧେଶ୍ୱର ତ୍ରିପାଠୀ
Comments
ସିଦ୍ଧେଶ୍ୱର ତ୍ରିପାଠୀ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
