ଘର୍ଘର ନାଦରେ ଅଗ୍ରସର ପ୍ରଗତିର ନନ୍ଦିଘୋଷ
ପତିତ ଉଦ୍ଧାର ପ୍ରାୟେ ମୋକ୍ଷପାଏ ଭୋକଶୋଷ
ଭକତ ସାନ୍ନିଧ୍ୟରେ ଜଗା ବଡ଼ଦାଣ୍ଡେ ଧୂଳିଧୂସର
ଭିଟାମାଟି ବଦଳରେ ଦାଦନର ଚାବୁକ୍ ପ୍ରହାର ।
ବିଜ୍ଞାନର ଆସ୍ଫର୍ଦ୍ଧାରେ ଫଳପ୍ରଦ ଚନ୍ଦ୍ରମା ବିଜୟ
ଉଦର ଜ୍ୱାଳାରେ ମୁଣ୍ଡ ବିକେ, ମାନିନିଏ ପରାଜୟ
ପରିବ୍ୟାପ୍ତ ସ୍ୱାଧୀନତାର ପରିଧି ଦେଶରୁ ବିଦେଶ
ଲୁହ କୋହର ସଉଦାରେ ହାରେ ଜୀବନର ସନ୍ଦେଶ ।
ଜାତିସଂଘେ ଫୁଲମାଳ, କେତେ ଗଣତନ୍ତ୍ରର ଡିଣ୍ଡିମ
ଗଣ୍ଡେ ଦାନା, ଖଣ୍ଡେ କନା ପାଇଁ ନିତି ସଂଘର୍ଷ ରକ୍ତୀମ
ବିଶ୍ୱଭାତୃତ୍ତ୍ୱର ମନ୍ତ୍ରରେ ଅୟୁତ ଚୁକ୍ତି ସ୍ୱାକ୍ଷରିତ
ତୋଷାମଦ ଜିନ୍ଦାବାଦ ପରେ ବି ରାସନ ପ୍ରତୀକ୍ଷିତ ।
ମହ ମହ ଆଳତି ବାସ୍ନାରେ ମନ୍ତ୍ରମୁଗ୍ଧ ଭାବଧାରା
ବିଜୟାଦଶମୀର ଉଲ୍ଲାସରେ ପ୍ରକମ୍ପିତ ବସୁନ୍ଧରା
ପରିବାର ପୋଷଣ ଯୁଦ୍ଧରେ ଭେଟେ ଦାରିଦ୍ର୍ୟ ରାବଣ
ସ୍ୱପ୍ନର ରାମରାଜ୍ୟେ ମିଳେ ଦାଦନ ଦାନବ କଷଣ ।
ଶାହାଜାହାନ ଦରବାରରେ ଶିଳ୍ପୀଙ୍କର ହସ୍ତ ଛେଦ
ସ୍ଥାପତ୍ୟ କ୍ରମାଙ୍କରେ ତାଜମହଲ ତୋଳେ ସାଧୁବାଦ
ଗଜପତି ଠିକାଦାର କାଟେ ଦାଦନର ହସ୍ତ ପାଦ
ଧର୍ମବାଦ ଆଢ଼ୁଆଳରେ ଉପେଷିତ ମାନବବାଦ ।
– ମାନସ ରଞ୍ଜନ ନାୟକ
Comments
ମାନସ ରଞ୍ଜନ ନାୟକ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ, ପ୍ରବନ୍ଧ ଆଦି ରଚନା କରିଥାନ୍ତି । ତାଙ୍କ ରଚନାଗୁଡ଼ିକ କିଛି ପତ୍ରପତ୍ରିକରେ ସ୍ଥାନ ପାଇଛି ।
