ଓଢ଼ଣା ତଳରୁ ମୁହଁ କାଢ଼ି ଯେବେ
ବେଲେଣା ବାଡ଼ି ତୁ ଧରିବୁ
ନିଜ ସ୍ୱାଧୀନତା ନିଜ ହାତେ ନେବୁ
ଅଧିକାର ଫେରି ପାଇବୁ ॥
ଲାଜେଇ ରହିଲେ ସକେଇ କାନ୍ଦିଲେ
ଦୁନିଆ ଗଞ୍ଜଣା ଖାଇବୁ
ପୁରୁଷ ପ୍ରାଧାନ୍ୟ ସମାଜରେ ତୁ ଲୋ
ଅବହେଳିତ ଯେ ହୋଇବୁ ॥
ଘରୁ ବାହାରିଲେ ଦଶଟା ପୁରୁଷ
ଡାହାଣା ଆଖିରେ ଚାହିଁବେ
ବିଟପୁରୁଷର ଲଗା ପଘା ନାହିଁ
ଝୁଣି ଝୁଣି ତତେ ଖାଇବେ ॥
ପୋଲିସ ସହାୟ ମିଳିବନି କେବେ
ରାଜନୀତି ପଶା ପାଲିରେ
ବିଟପୁରୁଷ ଓ ଗୁଣ୍ଡା ଏ ଜିତିବେ
ଅନ୍ଧ କାନୁନୁର ନ୍ୟାୟରେ ॥
ଆରକ୍ଷଣ ଦେଇ କର୍ମ କ୍ଷେତ୍ରେ ନେଇ
ଧର୍ଷଣ କରିବେ ରଣ୍ଡୁଆ
ନାରୀ କମିଶନ ଚେତା ଶୂନ୍ୟ ଥିବ
ହୋଇ ନେତାଙ୍କର ଭାଣ୍ଡିଆ ॥
ଅବଳା ନୁହଁ କି ଦୁର୍ବଳା ନୁହେଁ ତୁ
ଦୁର୍ଗା, ଚଣ୍ଡୀ ପୁଣି ଚାମୁଣ୍ଡା
ନିଜ ପରାକ୍ରମ ଦେଖାଅ ସମୟେ
ବାଟ ଭାଙ୍ଗିଯିବେ ଦୁର୍ଦଣ୍ଡା ॥
ହାଣ୍ଡିଶାଳା ଠାରୁ ଝାଡ଼ୁ ବେଲେଣାରୁ
ଯେତେକ ବିପ୍ଳବ ହୋଇଛି
ପେଣ୍ଟଡ଼ ମେଡ଼ିସିନ ଭଳି କାମକରି
ଅପୂର୍ବ ସଫଳ ପାଇଛି ॥
– ଶାନ୍ତନୁ ବିଶୋଇ
Comments
ଶାନ୍ତନୁ ବିଶୋଇ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
