ମିଛ ବାରିବାହ ପ୍ରବଳ ଚାପରେ
ଭାଙ୍ଗିଲା ସତ୍ୟ ଭୂଧର,
ଅତୀତର ସ୍ମୃତି ବାରିଧି ତରଙ୍ଗ
ଚିତ୍ତେ ଛାଏ ଅତୀତର ।
ଧୈର୍ଯ୍ୟର ଅସନ ଉପୁଡ଼ି ମହୀରୁ
କକୁଭ ଦିଏ ହଜାଇ,
ନୀୟତିର ଏ କି ବିଚିତ୍ର ସ୍ୱଭାବ
ସତ୍ୟାଶ୍ରିତ ଭାଲେ ଖାଇ ।
ଦନୁଜ ଆଚାର ବଡ଼ଭୀ ମାଣିକ୍ୟ
ପ୍ରାଚୁର୍ଯ୍ୟର ଲକ୍ଷ୍ମୀ ଭରା,
ବୃଜିନ ସ୍ୱଭାବ ପ୍ରଗତିର ନାବ
ଦିବସେ ଦେଖାଏ ତାରା ।
ଜାଣିଛି ପର୍ବତ ଚଢ଼ିବା ମାନବ
କଷଣ ସହେ ଅଶେଷ,
ଶିଖରୁ ଓହ୍ଲାଳୀ ଖସନ୍ତି ବେଗରେ
ମୁଖେ ଧରି ମଧୁହାସ ।
କର୍ମକୁ ଆଦରି ବାସରୁ ଅନ୍ତର
ଅବା ହେବା ବାସାନ୍ତର,
ସେ କେଉଁ ପରୀକ୍ଷ ବୁଝାପଡ଼େ ନାହିଁ
ଖୋଜେ ଆଜି ଯାଯାବର ।
– ଅଲେଖ ମେହେର
(ଟୀକା- ଭୂଧର- ପର୍ବତ, ଅତିତର- ଅତିଶୀଘ୍ର, ଅସନ- ଏକପ୍ରକାରର ବୃହତ ଜଙ୍ଗଲୀ ବୃକ୍ଷ, ଭାଲେ- କପାଳରେ, ଦନୁଜ- ରାକ୍ଷସ, ବୃଜିନ- ପାପ, ବାସରୁ ଅନ୍ତର- ଗୃହରୁ ନିର୍ବାସିତ, ବାସାନ୍ତର- ଶରୀରରୁ କପଡ଼ା କାଢ଼ିନେବା ଅବା ହିନସ୍ତା ଅପମାନ କରିବା ।)
Comments
ଅଲେଖ ମେହେର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
