ଆମ ଓଡ଼ିଶାରେ ଅନେକ ଜଳପ୍ରପାତ ରହିଛି ଆଉ ସେମିତି ଏକ ଜଳ ପ୍ରପାତ ହେଉଛି ମାଛକାନ୍ଦଣା ଜଳପ୍ରପାତ ।
ମୟୂରଭଞ୍ଜ ଜିଲ୍ଲାର ଶିମିଳିପାଳ ଜାତୀୟ ଉଦ୍ୟାନ ମଧ୍ୟରେ ଥିବା ଏହି ଜଳପ୍ରପାତଟି ପାଖରେ ପହଞ୍ଚିବାକୁ ହେଲେ ପାହାଡ଼ ଚଢ଼ି ପାହାଡ଼ିଆ ଝରଣା ପାର୍ ହେବାକୁ ପଡ଼ିଥାଏ । ବାରିପଦାଠାରୁ ୨୨ କିଲୋମିଟର ଦୂର ଲୁଲୁଙ୍ଗ ଓଟିଡିସି ବଙ୍ଗଳା ପର୍ଯ୍ୟନ୍ତ ଯିବାକୁ ପଡ଼େ ଏବଂ ଏହାପରେ ଆରମ୍ଭ ହୁଏ ମୁଖ୍ୟ ଯାତ୍ରା । ପାହାଡ଼ ଚଢ଼ି ପାଖାପାଖି ୮ କିଲୋମିଟର ପର୍ଯ୍ୟନ୍ତ ଯିବାକୁ ପଡ଼ିଥାଏ, ଏହି ଜଳପ୍ରାପାତଟିର ଝଲକ ପାଇଁ ।
ଲୁଲୁଙ୍ଗ ପର୍ଯ୍ୟନ୍ତ ଆପଣମାନେ ଗାଡ଼ିରେ ଯାଇପାରିବେ ଏବଂ ସେଠାରୁ ୨ କିଲୋମିଟର ଚାଲିବା ପରେ ହାତୀଟ୍ରାପ ପାହାଡ଼ ଚଢ଼ିବାକୁ ହୁଏ । ସେଠାରୁ ୩ କିଲୋମିଟର ଗଲାପରେ ଟାଙ୍ଗିବେଣ୍ଟ ପାହାଡ଼ ଉପରେ ୩ କିଲୋମିଟର ଯିବା ପରେ ଶୁଣାଯାଏ ମାଛକାନ୍ଦଣା ଜଳପ୍ରପାତର ମନଲୋଭା ଶବ୍ଦ । ଶବ୍ଦ ଶୁଣି ପାରୁଥିଲେ ମଧ୍ୟ ଜଳପ୍ରପାତଟିକୁ ଦେଖିବାକୁ ହେଲେ ଆହୁରି ଅଧାକିଲୋମିଟର ଚାଲିବାକୁ ପଡ଼େ ବାମପଟକୁ ।
ଏହା ହେଉଛି ତିନିଗୋଟି ଜଳପ୍ରପାତର ସମଷ୍ଟି । ପ୍ରଥମ ଜଳପ୍ରପାତ ନିକଟରେ ରହିଛି ଏକ ଗୁମ୍ପା, ଯେଉଁଠି ଦର୍ଶକମାନେ ଖରାବର୍ଷାରେ ଆଶ୍ରୟ ନେଇପାରିବେ । ପବନରେ ଦ୍ୱିତୀୟ ଜଳପ୍ରପାତର ଜଳକଣା ଗୁଡ଼ିକ ଉପରଆଡ଼କୁ ଆସୁଥାଏ ଆଉ ଅସ୍ତଗାମୀ ସୂର୍ଯ୍ୟ ସେଠାରେ ଇନ୍ଦ୍ରଧନୁର ଭ୍ରମ ସୃଷ୍ଟି କରେ ।
ତୃତୀୟ ଜଳପ୍ରପାତଟିକୁ ଦେଖିବାକୁ ହେଲେ ତଳକୁ ଓହ୍ଲାଇବାକୁ ପଡ଼ିଥାଏ, ଯାହାକୁ ଦେଖିବା ସମସ୍ତଙ୍କ ଭାଗ୍ୟରେ ନଥାଏ । ପାହାଡ଼ ଚଢ଼ିବାରେ ଅଭ୍ୟସ୍ତ ନଥିବା ଲୋକଟିଏ ତା’ ନିକଟରେ ପହଞ୍ଚିବାର ସାହାସ କରେନାହିଁ ।
ଦୁର୍ଭାଗ୍ୟର ବିଷୟ ଯେ ଶିମିଳିପାଳର ଏହି ସୁନ୍ଦର ଝରଣାଟି ପାଖରେ ପହଞ୍ଚିବା ପାଇଁ ସେତେଟା ସୁବିଧା ନାହିଁ, କିନ୍ତୁ ନିଜ ଚେଷ୍ଟାରେ ଆପଣମାନେ ଥରେ ଯାଇ ଏହାକୁ ଉପଭୋଗ କରିପାରିବେ ।
– ସଂଗ୍ରାମ କେଶରୀ ସେନାପତି
Comments
ସଂଗ୍ରାମ କେଶରୀ ସେନାପତି, ଶୁଭପଲ୍ଲବ ଓଡ଼ିଆ ଇ-ପତ୍ରିକାର ପ୍ରତିଷ୍ଠାତା ତଥା ସମ୍ପାଦକ । ସେ ଓଡ଼ିଆରେ ଗଳ୍ପ, ପ୍ରବନ୍ଧ ଆଦି ଲେଖାଲେଖି କରନ୍ତି ଏବଂ ଓଡ଼ିଆ ଉଇକିମିଡ଼ିଆର ବିଭିନ୍ନ ପ୍ରକଳ୍ପରେ ପ୍ରାୟତଃ କାର୍ଯ୍ୟ କରନ୍ତି ।
