ବିଭାବରୀ ଅନ୍ତେ ଉଷା ପ୍ରବେଶିଲା
ପଲ୍ଲବରେ ଶୁଭ ଆସିଲା
ପଲ୍ଲବେ ନୀହାର ମୁକ୍ତା ପରି ଦିଶେ
ରବି ରଶ୍ମି ଯେଣୁ ପଡ଼ିଲା । (୧)
ମଧୁମୟ ବନେ ବିହଙ୍ଗ ସଙ୍ଗୀତ
ସମୀରଣେ ଭାସି ଆସିଲା
ମଧୁପର ମଧୁ ଗୁଞ୍ଜେ ଗୁଞ୍ଜରଣ
ଝିଙ୍କାରି ଝଙ୍କାର ସରିଲା । (୨)
ପ୍ରାଚୀ ଗଗନରେ କୁଆଁତାରା ଧୀରେ
ଅଳପ ଅଳପ ଲୁଚିଲା
ନବପଲ୍ଲବରେ ଶୁଭ ଆସିଗଲା
ଫୁଲେ ଫୁଲେ ବାସ ଛୁଟିଲା । (୩)
କଜଳପାତିଟି ନିଦରେ ଚମକେ
ତରୁର ଗହଳ ଶାଖାରେ
ସୁରଭି ନର୍ତ୍ତନେ ବନରାଜି ଶୋଭା
କିଏ ତା’ ବଖାଣି ପାରେ । (୪)
ମଧୁମୟ ସୃଷ୍ଟି ସୁଧାମୟ ହେଲା
ବିଶ୍ୱନିୟନ୍ତାଙ୍କ ଇଙ୍ଗିତେ
ଅଚେତନ ଥିଲେ ଧରଣୀ ସନ୍ତାନ
ଜାଗିଲେ ନବୀନ ପ୍ରଭାତେ । (୫)
ଦିନବୃଦ୍ଧି ଦେଖି ପଦ୍ମ ବିକଶିତ
ଭୁରୁ ଭୁରୁ ବାସ ଚହଟିଲା
କଳକଣ୍ଠ କଣ୍ଠୁ ପଞ୍ଚମ ତାନରେ
ସୁର ସମୀରଣେ ମିଶିଲା । (୬)
ମୁନି ମୁଖୁ ବେଦ ଧ୍ୱନିର ଓଁ କାର
ବନେ ଉପବନେ ଶୁଭିଲା
ଦେବ ବିଭାବସୁ ଗଗନେ ଉଠିଲେ
ନବୀନ ଆଲୋକ ଆସିଲା । (୭)
ବନ ଲତା ରାଜି ହରଷିତ ହେଲେ
ଫୁଲ ଫଳ ହସି ଉଠିଲା
କଳିରେ କଳିରେ ଅଳିର ଗୁଞ୍ଜନ
ଶୁଭ ପଲ୍ଲବ କଲ୍ଲୋଳ ଦିଶିଲା । (୮)
– ସଦାନନ୍ଦ ପାଣିଗ୍ରାହୀ
Comments
ସଦାନନ୍ଦ ପାଣିଗ୍ରାହୀ
ସଦାନନ୍ଦ ପାଣିଗ୍ରାହୀ ପେଶାରେ ଜଣେ ଶିକ୍ଷକ ଏବଂ ନିଶା ତାଙ୍କର କବିତା ଲେଖିବା । ସେ କବିତା ଲିଖନ ପାଇଁ ଅନେକ ସ୍ଥାନରେ ପୁରସ୍କୃତ ମଧ୍ୟ ହୋଇଛନ୍ତି ।
